केंद्रीय पेट्रोलियम आ प्राकृतिक गैस मंत्री हरदीप सिंह पुरी काल्हि कहलनि कि भारत वैश्विक बाजारमे तेल खरेदी केर अपन स्रोतमे विविधता लाबय केर संग रूस केर तेल निर्यात पर अमेरिका केर कोनो कार्यवाहीसॅं सरकार चिंतित नहिं अछि।
ऊर्जा संवाद २०२५ मे बाजैत ओ कहलनि कि भारत एखनि ४० देशसॅं तेल खरीदैत अछि, जे २००७ मे २७ देशसॅं बेसी अछि आ वैश्विक बाजारमे एकर पर्याप्त आपूर्ति अछि ।
केंद्रीय मंत्री पुरी कहलनि, “बाजार मे तेलक भरमार छै। ईरान आ वेनेजुएला पर एखनि प्रतिबंध अछि। लेकिन की ई हमेशा लेल प्रतिबंध रहतै ? ब्राजील, कनाडा आ अन्य देश सहित बहुत देश उत्पादन बढ़ाबैत अछि। हमरा एखनि आपूर्तिक बारेमे अनावश्यक चिंता नहिं अछि। हम अपन स्रोतमे विविधता आनने छी।”
केंद्रीय मंत्री केर ई बयान अमेरिकी राष्ट्रपति डोनाल्ड ट्रंप केर रूसी तेल खरीदयवला देश पर प्रतिबंध लगाबय केर घोषणाक बाद देल गेल।
15 जुलाई केर ट्रंप धमकी देलनि कि जँ यूक्रेनक संग 50 दिनक भीतर शांति समझौता नहिं होइत अछि तऽ रूस पर कड़ा व्यापारिक प्रतिबंध लगा देल जायत। ट्रंप कहलनि कि रूसक निर्यात पर अमेरिकी टैरिफ १०० प्रतिशत धरि बढ़ाबय केर संग-संग रूससँ तेल खरीदयवला भारत आ चीन देश पर प्रतिबंध लगाबय केर धमकी सेहो देलनि।
ट्रंप केर धमकी पर केंद्रीय मंत्री पुरी कहलनि कि हम ई धमकी सुनने छी, दू विवादित पक्षक बीच एकटा मुद्दाक समाधान लेल किछु बयान देल जाइत छैक।
केंद्रीय मंत्री पुरी आगू कहलनि जे, भारतकेँ मास्कोसँ तेल खरीदलासँ वैश्विक बाजारमे दाम स्थिर करयमे अहम भूमिका रहल अछि।
