प्रधानमंत्री नरेन्द्र मोदी मंगलकेँ पीलीभीतमे भाजपा उम्मीदवार जितिन प्रसादक समर्थनमे एकटा चुनावी जनसभाकेँ सम्बोधित कयलनि।
एहि अवसर पर प्रधानमंत्री मोदी विपक्षी गठबन्धन पर जमि कऽ प्रहार कयलनि। ओ कहलनि जे कांग्रेस अयोध्यामे राम मंदिर नहिं बनेबाक बहुत प्रयास कयलक, मुदा जखन देशवासी एक-एक पाइ दऽ कए एतेक भव्य मंदिर बनौलक आ जखन मन्दिरवाला अहाँक सभ अपराध माफ कऽ अहाँके प्राण-प्रतिष्ठामे आमंत्रित कयलक, तखनि अहाँ (कांग्रेस) आमंत्रणकेँ अस्वीकार कए भगवान रामक अपमान कयलहुं आ जे नेता प्राण-प्रतिष्ठामे गेल, हुनका छह सालक लेल पार्टीसँ निष्कासित कऽ देलहुँ।
ओ कहलनि “हमर कल्याण सिंह जी अपन जीवन आ सरकार राम मंदिर लेल समर्पित कऽ देलनि। देशक प्रत्येक परिवार अपन आस्थाक अनुसार योगदान देलक। मुदा इंडी एलायंस पहिने सेहो राम मन्दिरक निर्माणसँ नफरत करैत छल आ आइयो एकरा नफरत करैत अछि।
पीएम मोदी कहलखिन कि पीलीभीतक धरती पर माता यशवंतरी देवीक आशीर्वाद अछि। एतय आदि गंगा माँ गोमतीक उद्भव स्थल अछि। आइ नवरात्रिक पहिल दिन हम देशकेँ इहो मोन पाड़ि रहल छी जे कोना इंडी गठबंधन शक्तिकेँ समाप्त करबाक शपथ लेलक अछि। आइ देशमे जाहि शक्तिक पूजा कयल जा रहल अछि, ओहि शक्तिक कांग्रेस द्वारा घोर अपमान कयल गेल अछि। आगा ओ कहलनि जे कांग्रेसक घोषणापत्र मुस्लिम लीगक घोषणापत्र प्रतीत होइत अछि। सपा आ कांग्रेस सीएए केर विरोध कए रहल अछि। विपक्षी गठबन्धन भारतकेँ विभाजित करबाक षड्यंत्रमे लागल अछि।
प्रधानमंत्री मोदी कहलनि जे ई कांग्रेसी नेता ओहि शक्तिकेँ उखाड़बाक बात कऽ रहल छथि जकर सामने हम माथ झुकाबैत छी।
पीएम मोदी कहलनि जे कांग्रेस आ ओकर इंडी गठबंधन देशक महान व्यक्तित्वक अपमान करबामे संकोच नहिं करैत अछि। कांग्रेस आ समाजवादी पार्टीक पैघ नेता आइ धरि स्टैच्यू ऑफ यूनिटीक दर्शन नहिं कयने छथि। ई लोकसभ विदेश घुमि अबैत छथि, मुदा अपने देशमे सरदार पटेलक प्रतिमाक दर्शन नहिं करैत छथि।
ओ कहलनि जे ई पूरा क्षेत्र खेतीक लेल सेहो जानल जाइत अछि। १९ साल पहिने किसानक की हाल छल, यूरियाक कालाबाजारी भेल, किसान पर लाठीचार्ज भेल। आइ यूरिया पर्याप्त मात्रामे उपलब्ध अछि। यूरियाक एकटा बोरा पहिने ३००० रुपैयामे भेटैत छल, मुदा हमर सरकार एकरा ३०० रुपैयासँ कम दाम पर दऽ रहल अछि। किसानक सम्मान निधि मिलि रहल अछि। मोदी सरकार किसानक बैंक खातामे ७० करोड़ रुपया ट्रांसफर कयलक अछि। पीलीभीतक किसानक बैंक खातामे ८५० करोड़ रुपया पहुंचल अछि।
प्रधानमंत्री कहलनि जे कोना कांग्रेस आ सपाक शासनमे गन्ना किसानसभकेँ अपने पैसाक लेल तरसाओल जाइत छल। एकरा अहाँसँ बढ़िया के जनैत अछि ? भाजपा सरकार गन्ना किसानक समस्या कम करबाक लेल पूरा ताकतसँ काज कयलक अछि। बहुत रास चीनी मिल खुजल अछि, कतेको विस्तार भेल अछि आ ई काज लगातार चलि रहल अछि।