केंद्रीय बंदरगाह, जहाजरानी आ जलमार्ग मंत्री सर्वानंद सोनोवाल घोषणा कयलनि कि भारत 2029 धरि दुनियाक तेसर सबसँ पैघ अर्थव्यवस्था बनय केर बाट पर अछि।
एनडीए सरकारक 11म वर्षगांठक अवसर पर डिब्रूगढ़मे आयोजित एकटा प्रेस कॉन्फ्रेंसकेँ संबोधित करैत केंद्रीय मंत्री कहलनि जे भारत नीतिगत पक्षपात आ वंशवादी कुशासनक दौरसँ बाहर निकलि गेल अछि आ आब कल्याणकारी नेतृत्व वाला विकास, युवा संचालित नवाचार आ भारी बुनियादी ढांचागत परिवर्तनक मामिलामे आगू बढ़ि रहल अछि।
ओ आगू कहलनि जे मात्र एक दशकमे 25 करोड़सँ बेसी भारतीय गरीबीसँ बाहर निकलि गेल छथि। ई अधिकांश यूरोपीय देशक आबादीसँ बेसी अछि। सर्वानन्द सोनोवाल कहलनि जे ई मोदीक गति, पैमाना आ ईमानदारीसँ डिलीवरीक गारंटी अछि।
मोदी सरकारक तहत आर्थिक प्रगति पर प्रकाश दैत सर्वानंद सोनोवाल कहलनि जे भारतकेँ चारिम सबसँ पैघ वैश्विक अर्थव्यवस्था बनय केर एखनि शुरुआत अछि। 2029 धरि भारत तेसर सबसँ पैघ अर्थव्यवस्था बनत। ओ कहलनि जे हमसब एकटा विकसित आत्मनिर्भर भारतक नींव राखि रहल छी।
पीएम-किसान, पीएम फसल बीमा योजना आ एमएसपीमे बढ़ोतरी योजनाक हवाला दैत सोनोवाल कहला जे मोदी सरकार भारतक किसानक गरिमा आ आमदनीकेँ बहाल कय रहल अछि। असममे आब धानक लेल 2,350 टका प्रति क्विंटल देल जा रहल अछि। ओ कहलनि जे ई किसानक उचित प्रतिफल अछि। खुशी व्यक्त करैत केंद्रीय मंत्री कहला जे पूर्वोत्तरमे परिवर्तन मोदी सरकारक सबसँ महत्वपूर्ण विरासतमे सँ एक अछि। ओ कहलनि जे प्रधानमंत्री मोदी 70 सँ बेसी बेर पूर्वोत्तरक दौरा कयलनि अछि। ई इतिहासक कोनो प्रधानमंत्रीक तुलनामे बेसी अछि।
