भारत कोयला उत्पादनमे 1 बिलियन टनक आकड़ा पार कय लेने अछि। एहि अवसर पर प्रधानमंत्री नरेंद्र मोदी शुक्र दिन एकर उपलब्धिकें देशक लेल ‘गर्वक क्षण’ आ ‘ऐतिहासिक मुकाम’ बतौलनि। ‘आत्मनिर्भर भारत’क दृष्टिकोणकेँ मजबूत करैत, एहि उपलब्धिकेँ भारतक ऊर्जा क्षेत्रकेँ पहिनेसँ बेसी मजबूती भेटबाक आ आयात पर निर्भरता कम होयबाक संभावना अछि।
पीएम मोदी केन्द्रिय कोयला आ खान मंत्री जी. किशन रेड्डी केर एक्स पोस्टकेँ रीशेयर करैत लिखलनि, “भारतक लेल गर्वक क्षण। 1 बिलियन टन कोयला उत्पादनक ऐतिहासिक मुकामकेँ पार करब एकटा शानदार उपलब्धि अछि।”
एहीसँ पहिने केंद्रीय कोयला आ खान मंत्री जी किशन रेड्डी एकटा एक्स हैंडल पोस्ट स’ पीएम मोदी क’ श्रेय दैत एही उपलब्धिक जानकारी देलनि। केंद्रीय कोयला एवं खान मंत्री जी. किशन रेड्डी एक्स पोस्टमे जानकारी देलनि जे, “भारत कोयला उत्पादनमे 1 बिलियन टनक एकटा पैघ आंकड़ा पार क’ गेल अछि। “पोस्टमे आगू कहलनि कि आधुनिक तकनीक आ कुशल खनन प्रक्रियाक अपनायबासँ नहि केवल उत्पादन बढल, बल्कि सतत आ जिम्मेदार खनन केर सेहो प्राथमिकता देल गेल। ई उपलब्धि हमर बढ़ैत बिजलीक मांग पूरा करत। संगहि आर्थिक विकास केर गति देत आ सम्पूर्ण भारतीय लेल एक उज्ज्वल भविष्य सुनिश्चित करत।
केंद्रीय मंत्री केर एक्स पोस्टक जवाबमे, पीएम मोदी लिखलनि जे ई उपलब्धि ऊर्जा सुरक्षा, आर्थिक विकास आ आत्मनिर्भरताक प्रति हमर प्रतिबद्धताकेँ उजागर करैत अछि। ई उपलब्धि देशक कोयला क्षेत्रसँ जुड़ल लोकक समर्पण आ मेहनतिकेँ सेहो दर्शाबैत अछि।
सप्ताहक शुरुआतमे, केन्द्र सरकार वित्त वर्ष 2025-26 मे बिजली क्षेत्रक लेल 906.1 मिलियन टन (एमटी) कोयला सप्लाय करबाक लक्ष्य रखने छल। कोयला मंत्रालय आगू वित्त वर्षक लेल कोयला केर आवश्यकताक लेल विद्युत मंत्रालयक अनुरोधक पश्चात संसद संग एहि योजना केर साझा केलक। वर्तमानमे, देशमे कोयला केर पर्याप्त आपूर्ति अछि। केन्द्रिय विद्युत प्राधिकरण (सीईए) केर अनुसार, 10 मार्च 2025 धरि कोयला आधारित पावर प्लांट लग 53.49 मीट्रिक टन केर स्टॉक छल। ई गत वर्ष एहि दिन दर्ज कएल गेल 44.51 मीट्रिक टन स्टॉक सँ 20.2 प्रतिशत बेसी अछि।
