प्रधानमंत्री नरेन्द्र मोदी मिथिला क्षेत्रीय बिहारक पूर्वी चम्पारणमे एकटा चुनावी जनसभाकेँ सम्बोधित कयलनि। मोदी पूर्वी चम्पारणसँ राधा मोहन सिंह, पश्चिम चम्पारणसँ संजय जायसवाल, वाल्मीकि नगरसँ सुनील कुमार आ शिवहरसँ लवली आनन्दकेँ वोट देबाक अपील कयलनि।
प्रधानमंत्री नरेन्द्र मोदी बिहारक पूर्वी चम्पारणमे एकटा चुनावी जनसभाकेँ सम्बोधित कयलनि। आब लोकसभा चुनावमे पूरा ध्यान छठम आ सातम चरण पर अछि। प्रधानमंत्री बिहार आ उत्तर प्रदेशमे बहुत रास चुनावी रैली कऽ रहल छथि। प्रधानमंत्री आजुक संबोधनक शुरुआत एहि तरहेँ कयलनि जे “पहिल चरणमे इंडी गठबन्धन पस्त, बादक चरणमे ध्वस्त आ पाँचम चरणमे पूर्ण रूपसँ परास्त भऽ गेल अछि।”
प्रधानमंत्री दावा कयलनि जे “४ जूनकेँ इंडी गठबंधनक तुष्टीकरणक राजनीति, समाजसँ लड़यवला गन्दा सोच, सनातनकेँ गारि देबयवला विकृत मानसिकता पर, अपराधी, माफिया, जंगलराज, महिला विरोधी मानसिकता आ टुकड़े गैंग पर जनता जोरदार प्रहार करत।”
प्रधानमंत्री पूर्वी चम्पारण, पश्चिमी चम्पारण, वाल्मीकिनगर आ शिवहरक एनडीए उम्मीदवारकेँ वोट देबाक अपील कयलनि।
प्रधानमंत्री कहलनि जे “एहि चम्पारणमे पूज्य बापू स्वच्छाग्रह आ सत्याग्रहक प्रयोग कयलनि। कांग्रेसकेँ पूज्य बापूसँ प्रेरणा लऽ कऽ देशमे स्वच्छताक अभियान शुरू करबाक चाहैत छल, मुदा ओ सत्तामे अबैत बापूक विचार, हूनक आचरण आ आदर्शकेँ त्यागि देलक। ओ अपन पूरा ध्यान मात्र एकटा परिवार पर देलनि। कांग्रेस आ ओकर सहयोगी दल मिलि कऽ देशक ६० साल बर्बाद कयलक।”
प्रधानमंत्री कहलनि – हम सभ घर-घरमे शौचालय आ बिजली पहुंचेलौंह। पछिला दस साल देशक गड्ढा भरबामे बीतल अछि। आब जनताक भविष्य सुधारय, हुनकर सपना पूरा करय लेल एकटा मजबूत सरकारक आवश्यकता अछि। हम पूज्य बापूक जन्मस्थलीसँ बापूक कर्मस्थलीमे अहाँक आशीर्वाद लेबाक लेल आयल छी। जे चानीक चम्मच लऽ कऽ जन्म लैत छथि ओ नहिं जनैत छथि जे मेहनति की होइत अछि। कांग्रेसक लोक कहि रहल छथि जे मोदी तोहर कब्र खोदब। एहि चुनावमे एहि लोकसभ लग मोदीकेँ गारि देबाक अतिरिक्त कोनो मुद्दा नहिं अछि।
पीएम कहलनि, “एकटा गरीब परिवारमे, मध्यमवर्गीय परिवारमे, जखन कोनो महिला अस्वस्थ होइत अछि, तखन ओ अपन पीड़ाकेँ नुका दैत अछि जाहिसँ ओकर बच्चा ऋणमे डूबि नहिं जाय। मोदी सभ मायक दर्द बुझैत छथि आ हुनका आब चिन्ता करबाक जरूरत नहिं अछि। दिल्लीमे अहाँक एकटा बेटा अछि। मोदी गरीबेक सेवा लेल जनमल अछि।” प्रधानमंत्री राम मन्दिरक प्राण प्रतिष्ठा कार्यक्रममे विपक्षकेँ नहिं अयबाक आ अनुच्छेद ३७० केँ निरस्त करबाक मुद्दा उठौलनि।
प्रधानमंत्री कहलनि, नीतीश कुमार बड़ मुश्किलसँ बिहारकेँ जंगलराजसँ बाहर निकाललनि। सुशील कुमार मोदी आ नीतीश कुमारक नाम जंगलराज समाप्त करयवलाक रूपमे याद राखल जायत। जँ बाबासाहेब नहिं रहितथि तऽ नेहरूजी अनुसूचित जाति आ अनुसूचित जनजातिकेँ आरक्षण नहिं दैतथि। कांग्रेस लग मात्र एकटा वोट बैंक बचल अछि। आइ कांग्रेस पार्टी वोट जिहाद वालाकेँ एससी, एसटी केर आरक्षण देबय चाहैत अछि।