बिहारक सीमावर्ती मिथिला क्षेत्रमे मुख्यमंत्री नीतीश कुमारक जनता दल यूनाइटेड (जेडीयू) आ तेजस्वी यादवक राजद दुनूकेँ झटका लागल। लोकसभा चुनावमे पूर्णिया सीट हारलाक बाद आब विधानसभा उपचुनावमे जेडीयू आ राजद दुनूकेँ रुपौलीमे हारिक सामना करय पड़ल अछि। रुपौलीमे उपचुनावक लेल १० जुलाईकेँ मतदान भेल छल, जकर परिणाम शनिदिन मतगणनाक बाद जारी कयल गेल। निर्दलीय शंकर सिंह जदयूक कलाधर मंडलकेँ ८,२११ मतसँ पराजित कयलनि, जखन कि राष्ट्रीय जनता दलक बीमा भारती तेसर स्थान पर रहलीह। राजग समर्थित जदयू उम्मीदवार कलाधर के उपचुनावमे मुख्यमंत्री नीतीश कुमार आ उप मुख्यमंत्री सम्राट चौधरी आ अन्य मंत्री खूब प्रचार कयलथि। मुदा निर्दलीय शंकर सिंह अकेले सभगोटे भारी पड़लाह।
नीतीशक पार्टी रुपौली उपचुनावक परिणामकेँ चौंकाबय वला बतौलनि। जदयूक प्रदेश अध्यक्ष उमेश सिंह कुशवाहा कहलनि जे हार-जीत होइत रहैत अछि, मुदा चुनाव परिणामक समीक्षा कयल जायत। रुपौली उपचुनाव जदयू लेल प्रतिष्ठाक मुद्दा छल। रुपौलीसँ जदयू विधायक रहल बीमा भारती लोकसभा चुनावसँ पहिने लालू आ तेजस्वी यादवक पार्टी राजदमे पाला बदलि लेलनि। ओ पूर्णियासँ राजदक टिकट पर लोकसभा चुनाव लड़लीह मुदा हारि गेलीह। मुदा, एहि चुनावमे पूर्णियासँ सांसद रहल जेडीयूक संतोष कुशवाहाकेँ सेहो पराजयक सामना करय पड़लनि। निर्दलीय उम्मीदवार पप्पू यादव एनडीए आ महागठबंधन दुनूकेँ धूरा चटा देने छलाह।
रुपौली विधानसभा उपचुनावमे एनडीए जीतबाक लेल अपन पूरा प्रयास कयलक। बिहारक मुख्यमंत्री नीतीश कुमार आ उप मुख्यमंत्री सम्राट चौधरी जदयू उम्मीदवार कलाधर मंडलक पक्षमे प्रचार कयलनि। केन्द्रीय मंत्री चिराग पासवान आ जीतन राम माँझी सेहो रुपौलीमे रैली कऽ कलाधरक लेल वोट माँगलनि। एकर अलावा नीतीश सरकारमे जेडीयू आ भाजपाक अनेको मंत्री सेहो गाम-गाममे प्रचार कयलथि। मुदा एहि सब दिग्गज लोकनिक सोझाँ अकेले निर्दलीय उम्मीदवार शंकर सिंह सभ पर भारी पड़ि गेलाह।
हालमे भेल लोकसभा चुनावमे जेडीयू मिथिलाक सीमावर्ती चारि सीटमेसँ तीनटा सीट- पूर्णिया, कटिहार आ किशनगंजमे राजगक नेतृत्वमे अपन उम्मीदवार उतारने छल। पार्टीक तीनू सीटपर हारिक सामना करय पड़ल। कांग्रेस दूटा सीट जीतलक आ निर्दलीय उम्मीदवार एकटा सीट जितलक। लोकसभा चुनावक किछु दिनक बाद पूर्णिया जिलाक रुपौली विधानसभा सीटपर भेल उपचुनावमे जेडीयूकेँ सेहो पराजयक सामना करय पड़ल। बिहारमे अगिला साल विधानसभा चुनाव हेबाक अछि।
