प्रखंड क्षेत्रक सज्जनपुरा पंचायतक कन्हौली गामक मध्य विद्यालय सज्जनपुराक नवनिर्मित भवनक लोकार्पण स्थानीय विधायक प्रो० विनय कुमार चौधरी कयलन्हि । ओहि दौरान ओ आम लोक सभकें शिक्षाक प्रति जागरूक हेबाक अपील करैत कहलनि जे शिक्षा बिना ई जीवन व्यर्थ अछि आ शिक्षा लेल सभ तरहक सहयोग करय लेल सरकार तत्पर अछि। ओ समय बीत गेलि अछि जखनि समाजमे लोक सभ कहैत छलाह जे आधा पेट खाऽ कय रहब मुदा बच्चाकेँ शिक्षा अवश्य देब । आब सरकार अहाँक बच्चा सबहक शिक्षा लेल कृत संकल्पित अछि। खासकय बिहारक मुख्यमंत्री नीतीश कुमार शिक्षाक क्षेत्रमे एकसँ एक अभिनव प्रयोग कयलन्हि अछि आ करैत रहैत छथि जाहिमे पोशाक , पाठ्य पुस्तक, मध्याह्न भोजन , छात्रवृत्तिक संग-संग छात्रक अनुपातमे शिक्षक आ सभ सुविधासँ पूर्ण विद्यालय भवनक निर्माण करवा रहल छथि । ताकी आहांक बच्चा एहि देशक स्वर्णिम भविष्य निर्माता बनि सकय ।
विधायक चौधरी महिला शिक्षा पर जोर दैत कहलनि जे सरकार बिहारमे महिला शिक्षा केर बढ़ावा दऽ कय बेटी सभकेँ नव उड़ान भरबाक अवसर आ क्षमता देलक अछि ।बिहार एक मात्र एहेन प्रदेश अछि जतय महिला शिक्षाकेँ बढ़ावा देबा लेल पाठ्य पुस्तकक संग संग पोशाक, छात्रवृत्ति आ साइकिल योजना आनिकय नव दिशा देबाक काज कयलक अछि । बिहार पहिल प्रदेश अछि जतय महिला सभकेँ ३५% आरक्षण दऽ कय आगू बढ़ेबाक अवसर प्रदान कयलक अछि । ओहि अवसर पर विधायक विनय चौधरी उपस्थित जनसमूहसँ अपन-अपन बच्चाकेँ निश्चित रूपसँ विद्यालय पठेबाक अनुरोध कयलनि आ शिक्षा लेल अपना आपके समर्पित करबाक आह्वान कयलनि । विधायक चौधरी आइ एहि लोकार्पण कार्यक्रममे विधायक कम आ एगो सफल शिक्षकक रूपमे देखयमे अयलाह।
पुनः विधायक चौधरी कन्हौली गाममे मृतक स्वर्गीय गंगा राम आ शुभ करण साहु केर घर पहुंचिकय मृतकक परिजन सभ केँ शांत्वना देलन्हि आ दुखक घड़ीमे धैर्यसँ काज लेबाक अपील कयलनि। ओहिकाल प्रखंड प्रमुख चौधरी मुकुन्द कुमार राय, शम्भु नाथ झा, पंचायत मुखिया कुंदन सिंह, भाजपाक पूर्वी मंडल अध्यक्ष रजनीश सुंदरम, रामशंकर सिंह, पप्पू सिंह ,शशिकांत साह , बीरबल राय, संजय मिश्र पप्पू , रीतेश सिंह , पूर्व मुखिया राधेश्याम मंडल , महेंद्र मंडल , अजीत , विनोद सिंह , मन्नू सिंह , संजय सिंह , बमभोला मंडल , बिमलेंद्र साहू सहित जदयू प्रखंड अध्यक्ष प्रखंड कीर्ति मोहन झा आ सैकड़ो लोक मौजूद छलथि।
