लोकसभा चुनाव २०२४ केर पाँचम चरणक आइ सोम २० मईकेँ मतदान होमय जा रहल अछि। एहि दौरान ६ राज्य सहित २ केंद्र शासित प्रदेशक ४९ सीटक लेल मतदान होयत, जाहिमे ६९५ उम्मीदवारक भाग्य ईवीएम मशीनमे कैद होयत। आजुक मतदान बहुत खास मानल जा रहल अछि, किएक तँ सत्तारूढ़ दल भाजपाक कतेको पैघ नेताक भाग्य आइ दांव पर लागल अछि। एहिमे अमेठीसँ स्मृति ईरानी, लखनऊसँ रक्षामंत्री राजनाथ सिंह, वायनाडसँ राहुल गाँधी आ झाँसीसँ पूर्व केन्द्रीय मंत्री प्रदीप जैन आदित्य कांग्रेसक टिकट पर चुनाव लड़ि रहल छथि।
बतबैत चली जे शनिकेँ पाँचम चरणक चुनाव प्रचार बंद भऽ गेल। एकर बाद आइ मतदान होबए जा रहल अछि। आइ ७ चरणक मतदानक पाँचम चरण अछि। आइ एहि राज्य सभ उत्तर प्रदेश, पश्चिम बंगाल, बिहार, महाराष्ट्र, ओडिशा, झारखंड, जम्मू-कश्मीर आ लद्दाखमे चुनाव होबय जा रहल अछि।
एक दृष्टि दिग्गज सभ पर :-
रायबरेली : एहि बेर राहुल गांधी रायबरेली सीटसँ चुनाव लड़ि रहल छथि। भाजपा राज्य मंत्री दिनेश प्रताप सिंहकेँ हुनक विरुद्ध चुनाव लड़बाक लेल मैदानमे उतारने अछि। पछिला चुनावमे सोनिया गाँधी दिनेश प्रताप सिंहकेँ १.६७ लाखसँ बेसी मतसँ पराजित कयने छलीह।
अमेठी : कांग्रेस गांधी परिवारक दीर्घकालिक वफादार के एल शर्माकेँ अमेठीमे ईरानीकेँ चुनौती देबाक लेल मैदानमे उतारने अछि। २०१९ मे ईरानी राहुल गांधीकेँ ५५ हजारसँ बेसी मतक अन्तरसँ पराजित कयलनि।
लखनऊ: केन्द्रीय रक्षा मंत्री राजनाथ सिंह उत्तर प्रदेशक राजधानी लखनऊमे लगातार तेसर बेर चुनाव लड़ि रहल छथि। हुनका समाजवादी पार्टी (सपा)क रविदास मेहरोत्रा आ बहुजन समाज पार्टी (बसपा)क सरवर मलिकक विरोधक सामना करय पड़ि रहल अछि। लखनऊ सीट पहिने पूर्व प्रधानमंत्री अटल बिहारी वाजपेयी लग छल, जे १९९१सँ भाजपाक गढ़ रहल अछि।
कैसरगंज : कैसरगंज सीट, जकर प्रतिनिधित्व भारतीय कुश्ती महासंघ (डब्ल्यूएफआई) केर पूर्व अध्यक्ष बृजभूषण शरण सिंह कऽ रहल छथि, सोम दिन मतदान होमय जा रहल अछि। भाजपा एहि सीटसँ वर्तमान सांसदक बेटा करण भूषण सिंहकेँ मैदानमे उतारने अछि। हुनकर मुकाबला समाजवादी पार्टीक भगत राम मिश्र आ बहुजन समाज पार्टीक नरेन्द्र पाण्डेयसँ अछि।
झाँसी : पूर्व केन्द्रीय मंत्री प्रदीप जैन आदित्य कांग्रेसक टिकट पर चुनाव लड़ि रहल छथि। हुनका भाजपाक वर्तमान सांसद अनुराग शर्मा चुनौती दऽ रहल छथि। बसपा स्थानीय छात्र नेता रवि प्रकाश मौर्यकेँ मैदानमे उतारने अछि।
मुंबई उत्तर : केंद्रीय मंत्री पीयूष गोयलक भाग्यक फैसला सेहो पांचम चरणमे आइ होएत। गोयल कांग्रेसक भूषण पाटिलक खिलाफ चुनाव लड़ रहल छथि।
