गुजरातक बनासकांठामे पटाखा कारखानामे भीषण आगिक हादसामे 20 श्रमिकक मृत्यु भ’ गेल अछि। हादसामे मृत श्रमिकसभमे सभ मध्य प्रदेशक श्रमिक बताओल जा रहल अछि। एहिमे हरदा जिलाक हंडियासँ आठ आ छह देवासक श्रमिकक पहिचान भेल अछि। मृतकसभमे बाकी छः व्यक्तिक पहिचान होयब बाकी अछि।
हरदा जिला प्रशासन एडीएमक नेतृत्वमे एकटा टीम गठित कएलनि अछि। एकरा लेल प्रशासन आ पुलिसक एकटा टीम हरदासँ बनासकांठा रवाना कएल गेल अछि।
मुख्यमंत्री डॉ. मोहन यादव गुजरातक बनासकांठामे पटाखा फैक्ट्रीमे विस्फोटसँ मध्यप्रदेश निवासी श्रमिकक असामयिक निधन पर गहिंर दुःख व्यक्त कएलनि। मुख्यमंत्री कहलनि जे मध्यप्रदेश सरकारक गुजरात सरकारक संग लगातार संपर्क बनेने अछि। श्रमिकक सहायता आ परिवारक मददि लेल सभ आवश्यक प्रयास होयत। मुख्यमंत्री डॉ. यादव बाबा महाकालसँ असमय दिवंगत श्रमिकक आत्माक शांति लेल प्रार्थना कएलनि।
जनतब जे मंगलदिन बनासकांठा जिला केर डीसा औद्योगिक क्षेत्रमे पटाखा बनाबयवाला एकटा फैक्ट्रीमे भोरमे अचानक आगि लगि गेल। एही कड़ीमे विस्फोट होयबाक कारणे फैक्ट्रीक किछु भाग ढ़हि गेल आ भीतर किछु श्रमिक फंसि गेल। एही दुर्घटनामे 20 मजदूरक मृत्यु केर जानकारी अछि। संगहि, जानकारीक अनुसार हादसा वला स्थान पर केवल भंडारण केर अनुमति छल, मुदा एकर आड़मे गोदामक स्थान पर पटाखा फैक्ट्री चलायल जा रहल छल।
नेता प्रतिपक्ष उमंग सिंघार गुजरातक बनासकांठामे पटाखा फैक्ट्रीमे भेल विस्फोटकेँ दुःखद बताबैत चिंता व्यक्त कएलनि। हुनक कहब छल जे एहि घटनामे मध्य प्रदेशक कतेको मजदूर शामिल छल, जे दू दिन पहिने रोजगारक तलाशमे ओहिठाम पहुँचि कऽ पटाखा बनेबाक काज कऽ रहल छल। उमंग सिंघार सरकार पर सवाल उठबैत कहलनि जे रोजगारक दावा करय वला सरकार एतेक अक्षम भऽ चुकल अछि जे मजदूर सभकें रोजगारक लेल दोसर राज्यमे पलायन करऽ पड़ि रहल अछि, जाहि ठाम हुनका अपन जान तक गमाबऽ पड़ैत अछि।