दिल्ली पुलिस आम आदमी पार्टीक राज्यसभा सांसद स्वाति मालीवाल पर कथित हमलाक मामिलामे रविदिन मुख्यमंत्रीक निवासक डिजिटल वीडियो रिकॉर्ड (डीवीआर) जब्त कऽ लेलक।
मालीवाल आरोप लगओलनि अछि जे मुख्यमंत्री अरविन्द केजरीवालक निजी सचिव विभव कुमार १३ मईकेँ मुख्यमंत्रीक निवासक भीतर हुनका सङ्ग दुर्व्यवहार कयलनि आ हुनका सङ्ग मारिपीट कयलनि। पुलिस मामिला दर्ज कए शनि दिन आरोपीकेँ गिरफ्तार कए लेलक। बादमे स्थानीय अदालत हुनका लोकनिकेँ पाँच दिनक पुलिस हिरासतमे भेजि देलक।
सूत्र कहलक जे पुलिस टीम घटनाक फुटेज प्राप्त करबाक लेल मुख्यमंत्रीक निवाससँ एकटा डीवीआर आ अन्य इलेक्ट्रॉनिक उपकरण जब्त कयलक अछि। पुलिसक कहब अछि जे विभव कुमार पूछताछक दौरान स्पष्ट जवाब नहिं दऽ रहल छथि।
पुलिस अदालतकेँ कहलक जे हुनका देल गेल सीसीटीवी फुटेज खाली छल। विभव कुमार अपन मोबाइल फोन पुलिसकेँ सौंपि देलनि मुदा पासवर्डक खुलासा नहिं कयलनि। एकर अतिरिक्त, कुमार एक दिन पहिने खराबीक बहाना बना कऽ अपन मोबाइल फॉर्मेट कऽ लेने छलाह। पुलिस अदालतकेँ कहलक जे फोनकेँ फॉर्मेट करबासँ पहिने ओकर डेटाक क्लोनिंग करय पड़ैत अछि। अतः ओहि फोनक आँकड़ा पुनः प्राप्त करबाक लेल मुम्बई लऽ जायल जायत कियैक तँ आँकड़ाकेँ पुनः प्राप्त करबाक लेल विशेषज्ञसभक समक्ष हुनक उपस्थिति आवश्यक अछि।
