मुख्यमंत्री नीतीश कुमार मंगलदिन समस्तीपुर जिलाक सरायरंजन प्रखंडमे 522 करोड़सँ बेसीक विकास परियोजनाक शिलान्यास कयलथि। एहि अवसर पर ओ अधिकारी सबकेँ समय पर काज पूरा करबाक सख्त निर्देश देलथि।
मुख्यमंत्री सरायरंजन प्रखंडक मणिका गाममे स्थित राजकीय उत्क्रमित उच्च विद्यालयसँ करीब 200 करोड़क तीनटा योजनाक शिलान्यास कयलथि। एहिमे शिवजीनगर प्रखंडक करेह नदी पर शंकरपुर घाट पर एकटा पैघ आरसीसी पुल आ एप्रोच रोड, मणिकासँ विक्रमपुर तक बाईपास रोड आ रोसड़ा-शिवाजीनगर-बरियाही घाट-बहेडी सड़क केर चौड़ा आ सुदृढ़ीकरण शामिल अछि।
एकर बाद मुख्यमंत्री मुसापुर ग्राम पंचायतक नीलकंठ महादेव मंदिरसँ बलान आ जमुआरी नदीसँ गाद हटाबयकेँ पैघ परियोजना सेहो शुरू कयलथि। एहि पर 322 करोड़ टाका खर्च होयत। एहि काजसँ साल भरि नदीमे पर्याप्त पानि रहत आ बाढ़िक समय आसपासक इलाकामे पानि भरबाक समस्या सेहो काफी हद तक दूर भs जायत।
जल संसाधन विभागक सचिव संतोष कुमार मल्ल आ पथ निर्माण विभागक सचिव संदीप पुदुकलकट्टी मुख्यमंत्रीक योजनाक बारेमे पूरा जानकारी देलखिन्ह। एहि दौरान मुख्यमंत्री कहला जे राज्य सरकार सभ इलाकामे सड़क, पुल, स्कूल आ अस्पताल जेहन बुनियादी सुविधा केर मजबूत कs रहल अछि। ओ कहला जे नदीक गादि साफ कयलाक बाद आसपासक गाममे भू-जल स्तरमे सेहो सुधार होयत।
जनतब जे मुख्यमंत्री एहि साल जनवरीमे अपन प्रगति यात्राक दौरान एहि योजनाक घोषणा कयने छलाह। समस्तीपुर, बेगूसराय आ मुजफ्फरपुर जिलाक कतेको प्रखंडक लोककेँ एहि परियोजनासँ सीधा फायदा होयत।
एहि कार्यक्रममे केंद्रीय गृह राज्यमंत्री नित्यानंद राय, जल संसाधन मंत्री विजय कुमार चौधरी, सांसद शांभवी चौधरी, विधायक राजेश कुमार सिंह, बहुत रास पूर्व मंत्री आ जनप्रतिनिधि आ शीर्ष अधिकारी उपस्थित छलथि। मुख्यमंत्रीक आगमनक दौरान ग्रामीण बरखामे भीजलाक बादो ‘नीतीश कुमार जिंदाबाद’ आ ‘मोदी है तो मुमकीन है’ केर नारा लगेलनि। एहि दृश्यसँ साफ पता चलल जे जनता विकास योजनाक प्रति उत्साहित अछि।
