समस्तीपुरमे छात्र नेता सहित ३ गोटेकेँ मारलक गोली, एकक मृत्यु

समस्तीपुर समदिया
*

समस्तीपुरक मुफस्सिल थानाक जितवारपुर सपनामे शनिदिन राति लगभग ११ बजे घरक दरवजा पर बैसल तीनटा लोककेँ बदमाश गोली मारलक। ओहिमेसँ एक गोटेक मृत्यु घटनास्थले पर भऽ गेल । कहल जा रहल अछि जे गृहस्वामी देवनारायण रायक जमीनकेँ लऽ कऽ दरवजा पर विवाद भेल छल । गामक तीन- चारिटा गणमान्य व्यक्ति ओतए बैसल छलाह। एम्हर एकटा बन्दूक लऽ कऽ ओतय आबि अपराधी देवनारायणकेँ गोली मारलक। छातीमे गोली लागल। ओकर बाद अपराधी हुनकर बेटा 45 वर्षीय सुरेंद्र रायकेँ छातीमे गोली मारि देलक। गोलीबारीक घटनामे हस्तक्षेप करबाक लेल आगू आयल २५ वर्षीय मुलायम सिंह यादवकेँ सेहो उपद्रवी सभ गोली मारि घायल कऽ देलक। हुनका पेटक बायां भागमे गोली मारल गेल छल। मुलायम अखिल भारतीय विद्यार्थी परिषदक पदधारक आ सुरेन्द्र रायक सार छथि। सुरेन्द्र रायक हालत गंभीर बतायल जा रहल अछि। पुलिस घटनास्थल पर पहुँचि गेल अछि आ मामिलाक जाँच कऽ रहल अछि। सुरेन्द्र राय आ मुलायम सिंहकेँ इलाजक बाद सदर अस्पतालसँ रेफर कयल गेल अछि।