घटना मिथिला क्षेत्रीय बिहारक भागलपुरमे बाराती गाड़ी स्कार्पियो पर पलटल ट्रक, दबि कऽ गेल ६ लोकक जान Maithil Punarjagran Prakash April 30, 2024 0 Comments भागलपुर * मिथिला क्षेत्रीय बिहारक भागलपुरमे एकटा पैघ सड़क दुर्घटना भऽ गेल। एहि दुर्घटनामे आधा दर्जन लोकक मृत्यु भऽ चुकल अछि। ई मामिला भागलपुर जिलाक घोघा थाना क्षेत्रक आमापुर गाम लगक एनएच-८० परक अछि। कहल जा रहल अछि जे एकटा बाराती वाहन पर हाईवा ट्रक पलटि गेल। बारात मुंगेरसँ पीरपैंती जा रहल छल। आमापुर लग स्कॉर्पियो पर हाईवा ट्रक पलटि गेलासँ छओ लोकक मौकापर मृत्यु भऽ गेल। हाईवा ट्रक पलटलाक कारण स्कॉर्पियो मलबामे ढ़कि गेल। देर राति धरि बचाव अभियान चलाओल गेल आ घायल लोकसभकेँ भागलपुरक जवाहरलाल नेहरू मेडिकल कॉलेज अस्पतालमे भर्ती कयल गेल। सबके हालत गंभीर बनल अछि। कहल जा रहल अछि जे एहि राष्ट्रीय राजमार्ग पर सड़क निर्माणक काज चलि रहल छल। ई घटना सोमदिन राति लगभग ११:३० बजे केर अछि। रॉडसँ भरल हाईवा ट्रकक टायर फटि गेल आ बारातीसँ भरल स्कॉर्पियो पर पलटि गेल। हाईवामे लोड छड़क नीचा स्कार्पियो दबलासँ एकटा बच्चा सहित छओ बारातीक मौकेपर मृत्यु भऽ गेल। घटनाक बाद पुलिस स्थानीय लोकक मदतिसँ मलबामे फँसल तीनटा घायलकेँ बचा कऽ इलाजक लेल भागलपुरक जवाहरलाल नेहरू मेडिकल कॉलेज अस्पताल पठौलक। घटनाक बारेमे कहल जा रहल अछि जे बारात मुंगेरक खड़गपुर थाना क्षेत्रक धापड़ी मोड़ गोबड्डा पंचायतक गोरिया टोलीसँ भागलपुरक पीरपैंतीक श्रीमतपुर गाम जा रहल छल। बारातीसँ भरल स्कॉर्पियो कारमे चालक सहित ९ गोटे छलाह। कहल जा रहल अछि जे मुंगेरक गोरिया टोला निवासी सुनील दासक बेटा मोहितक बारात श्रीमतपुर गामक स्व. विजय रविदास ओतए जा रहल छल। ओतहि घटनास्थल पर उपस्थित लोकक कहब अछि जे बारातसँ भरल स्कॉर्पियो कहलगांव दिस जा रहल छल आ छड़सँ भरल एकटा ओवरलोड ट्रक कहलगांवसँ भागलपुर दिस आबि रहल छल। एनएच-८० सड़कक निर्माणक कारणेँ सड़क एक दिस ऊँच आ दोसर दिस नीचा छल। एम्हर लोहाक छड़सँ भरल ट्रकक टायर फटि गेल आ नियंत्रण खतम भऽ गेल आ स्कॉर्पियो पर पलटि गेल। हादसाक बाद मृतकक पहिचानमे पुलिस जुटि गेल छल। Spread the love