मतदाता सूचीमे कथित गड़बड़ीक खिलाफ विपक्षी सांसद मार्च निकालि चुनाव आयोग पर गंभीर सवाल उठेलनि अछि। कांग्रेस, टीएमसी आ अन्य विपक्षी दलक नेता अपन नाराजगी व्यक्त करैत लोकतंत्र पर पड़यवला खतराक बारेमे कहलनि। ई नेता सब अपन बयानमे चुनाव आयोगक कार्यशैली पर सवाल उठाबैत एकरा तानाशाही बतौलनि।
कांग्रेस नेता अमरिंदर सिंह राजा कहलनि जे, “पीएम मोदीक समयमे ककरो आवाज उठेबाक अधिकार नहि अछि, जा धरि हमरा सबकेँ न्याय नहि भेटत ता धरि कांग्रेस पार्टी आ इंडिया एलायंस लड़ैत रहत। हरियाणामे हमर सरकार आठ सीटसँ हारल छल। तहिना मध्य प्रदेश आ छत्तीसगढ़मे सेहो हम सब फेर जीतयवला छलहुं, मुदा हमरा सब लग कोनो सबूत आ तथ्य नहि छल, ताहि लेल हम सब चुप रहलहुं। हम सब गप कयलहुं तथ्यक संग आ हमरा सबकेँ लगैत अछि जे भाजपा एहि चुनावमे जीत नहि हासिल कयलक अछि।”
टीएमसीक सांसद सुष्मिता देव सेहो चुनाव आयोगक भूमिका पर सवाल उठबैत कहलनि जे, “हम सब कतेको महीनासँ चुनाव आयोगकेँ कहैत आबि रहल छी जे वोटर तालिकामे एक नंबर पर डुप्लीकेशन अछि। ममता दीदी फरवरीमे नेताजीक मूर्तिक सामने ई बात कहने छलीह। राहुलजी एकटा प्रेस कॉन्फ्रेंसमे कहने छलाह जे जँ चुनाव आयोग नकली मतदाताक माध्यमसँ 2024 केर चुनाव कयलक अछि तँ प्रधानमंत्रीकेँ पार्टीसँ हटा देल जाय।”
ओ सवाल पूछलनि जे, “अहां 2024 केर चुनाव कोना संचालित केलहुं ? लोकतंत्रमे हमरा सबकेँ अधिकार अछि, हम सब जनताकेँ प्रतिनिधि छी। वोटक चोरी भेल अछि, जे पूर्णतः तानाशाही अछि, हम सब एकरा स्वीकार नहि करब। ई लोकतांत्रिक देश अछि। एहि तरहेँ अहाँ नकली मतदाता लगा कय भाजपाक पक्षमे राजनीतिक माहौल बनेबाक प्रयास कय रहल छी।”
कांग्रेस सांसद गुरजीत सिंह औजला मतदाता सूचीमे पैघ पैमाना पर गड़बड़ीक आरोप लगौलनि। ओ कहलनि जे, “पांच महीनामे 50-50 लाख वोट जोड़ल जा रहल अछि, ई कोनो छोट बात नहि अछि। पूरा देश पूछि रहल अछि जे लोकतंत्रक नाम पर की भऽ रहल अछि ? ई तानाशाही अछि। जाहि तानाशाहीसँ हमरा सबकेँ 1947 मे आजादी भेटल छल, ओहि तानाशाहीकेँ जबरदस्ती हमरा सब पर थोपबाक प्रयास भऽ रहल अछि।”
कांग्रेस नेता जयराम रमेश मार्चक दौरान पुलिसक द्वारा रोकला पर नाराजगी व्यक्त करैत कहलनि जे, हम सब शांतिसँ मार्च कय रहल छलहुं, मुदा हमरा सबकेँ रोकल गेल। हमर सबहक मांग छल जे विपक्षी सांसद अपन दस्तावेज चुनाव आयोगक सामने पेश करताह। ओ सब एकर कोनो जवाब नहि देलक।
