महाराष्ट्रमे शपथ ग्रहण समारोह ५ दिसम्बरकेँ मुम्बईक आजाद मैदानमे होयत। एहिमे मुख्यमंत्री आ दूटा उपमुख्यमंत्री शपथ लेताह। नव महायुति सरकारक शपथग्रहण समारोहक लेल आजाद मैदानमे तैयारी जोर-शोरसँ चलि रहल अछि, जाहिमे प्रधानमंत्री नरेन्द्र मोदीक भाग लेबाक आशा अछि।
भाजपा विधायक दलक बैसार आइ ४ दिसंबरकेँ होबयवला अछि। भाजपा केन्द्रीय मंत्री निर्मला सीतारमण आ पूर्व मुख्यमंत्री विजय रूपाणीकेँ केन्द्रीय पर्यवेक्षक नियुक्त कयलक अछि। दुनू नेता महायुतिक नेतासभक सङ्ग बैसार करबाक लेल मुम्बई जायत आ तकर बाद विधायक दलक बैसारमे मुख्यमंत्रीक नामक घोषणा करत।
महाराष्ट्र भाजपा अध्यक्ष चन्द्रशेखर बावनकुले, जे एहि आयोजनक तैयारीक देखरेख कऽ रहल छथि, सोमदिन दक्षिण मुम्बईमे आयोजन स्थलक दौरा कयलनि।
बावनकुले पहिने कहने छलाह जे मोदी एहि समारोहमे भाग लेताह, मुदा एनडीए शासित राज्यक मुख्यमंत्री आ उपमुख्यमंत्रीकेँ सेहो निमंत्रण पठाओल गेल अछि। भाजपा सूत्र बतौलनि जे एकर अतिरिक्त केन्द्रीय मंत्री, राज्यपाल आ भाजपाक प्रमुख केन्द्रीय पदाधिकारीक सेहो उपस्थित रहबाक आशा अछि।
भगवा पार्टी २० नवम्बरकेँ भेल चुनावमे २८८ सदस्यीय महाराष्ट्र विधानसभामे १३२ सीट जीतैत अपन सर्वश्रेष्ठ चुनावी प्रदर्शन दर्ज कयलक। महायुति गठबन्धन जाहिमे एकनाथ शिंदेक नेतृत्ववला शिवसेना आ अजित पवारक नेतृत्ववला राष्ट्रवादी कांग्रेस पार्टी सम्मिलित अछि, कुल २३० सीट जितलक। भाजपाक मुख्यमंत्री पर शिवसेना गृहमंत्रीक मांग कयने छल, मुदा प्रायः उपमुख्यमंत्री पर मानि गेल अछि।
