झारखंडक चुनावमे हेमंतक गठबंधन ५५ सीट आ एनडीए सिमटत २५ सीट पर

राँची
*

झारखण्डक सभटा ८१ विधानसभा सीटक रुझान समाचार लिखय तक प्रायः स्पष्ट भऽ गेल छल। चुनाव आयोग द्वारा जारी आंकड़ाक अनुसार, इंडिया ब्लॉक ५५ सीटपर आगाँ छल आ एनडीए २५ सीटपर आगाँ छल। निर्दलीय दू सीट पर बढ़त बनेने छल।

राज्यमे सरकार बनेबाक लेल न्यूनतम बहुमतक आंकड़ा ४१ अछि। जाहि गठबन्धन वा दलक लग ई संख्या अछि ओकरा सरकार बनयबाक मौका भेटत। २०१९ मे हेमंत सोरेनक नेतृत्ववला झामुमो-कांग्रेस-राजद गठबंधन ४७ सीट जीतकऽ सरकार बनौलक। एहि बेर चुनावमे एनडीए आ इंडी गठबंधनक बीच लड़ाई चलि रहल अछि।

एनडीए ६८, आजसू १०, जदयू २ आ लोजपा (आर) १ सीट पर चुनाव मैदान मे उतरल अछि। दोसर दिस झामुमो ४३ सीटपर, कांग्रेस ३० सीटपर, राजद ६ सीट पर आ भाकपा-माले ४ सीट पर अपन उम्मीदवार ठाढ़ कयने छल।राज्यक विभिन्न सीटक लेल कुल १२११ उम्मीदवार चुनाव मैदानमे छलथि। राज्यमे १३ आ २० नवम्बरकेँ दू चरणमे मतदान भेल छल। कुल ६७.७४ प्रतिशत मतदाता अपन वोट देलनि। एहि आंकड़ामे डाक मतपत्र सम्मिलित नहिं अछि। कुल १,७६,८१,००७ (१,७६,८१,००७) लोक अपन मताधिकारक प्रयोग कयलनि। जाहिमे महिला मतदाताक संख्या पुरुषक तुलनामे ५ लाख ५१ हजार ७९७ (५,५१,७९७) बेसी अछि।

प्रधानमंत्री मोदी सेहो हेमंत सोरेनकेँ बधाई देलनि। हेमंत सोरेन कहलनि जे, “अहाँसभ संभवतः एतय पहिल बेर एहेन चुनाव देखलहुं। हम लोकतंत्रक परीक्षा सफलतापूर्वक पास कए चुकल छी। प्रधानमंत्री नरेन्द्र मोदी सेहो हमरासभकेँ एहि जीतक लेल बधाई देलनि अछि। एहि लेल हम हुनका सभकेँ सेहो धन्यवाद दैत छी।”

हेमंत सोरेन एकटा संवाददाता सम्मेलनकेँ सम्बोधित करैत कहलनि, “झारखण्डमे इंडिया गठबंधनक जीतक लेल राज्यक जनताकेँ बधाई। किछु जगह पर वोटक गिनती चलि रहल अछि। अहाँ सभ जनैत छी जे इंडिया गठबंधन आ राजगक बीच चुनावी प्रतिस्पर्धा छल। एतय इंडिया गठबंधन नीक प्रदर्शन करैत देखाइत अछि। सभ जाति आ धर्मक लोक एहि राज्यक मतदाता, एहि राज्यक आधा जनसंख्या, युवा, महिला, पुरुष, किसान, मजदूर वोट देलनि। हम एहि लेल हुनका सभकेँ धन्यवाद दैत छी आ आभार व्यक्त करैत छी।”