प्रधानमंत्री नरेंद्र मोदी बुधदिनक कनाडा केर कनानास्कीमे जी-7 शिखर सम्मेलनक आउटरीच सत्रमे भाग लेलनि “आतंकवादक समर्थन आ बढ़ावा देबयवला देशक खिलाफ सख्त कार्यवाही” केर आह्वान कयलनि।
हुनक ई बयान ऐहन समयमे देल गेल अछि जखनि पाकिस्तान सेनाक चीफ फील्ड मार्शल असीम मुनीर अमेरिकामे छथि आ बुधकेँ व्हाइट हाउसमे दुपहरक भोजन केर दौरान राष्ट्रपति डोनाल्ड ट्रंपसँ भेंट कयलनि।
सुरक्षा चुनौती पर जोर दैत प्रधानमंत्री मोदी देशसँ आतंकवादक खिलाफ वैश्विक लड़ाईकेँ मजबूत करबाक आह्वान कयलनि। आतंकवादक खिलाफ लड़ाईमे भारतक मजबूत सहयोगक लेल वैश्विक समुदायकेँ धन्यवाद दैत प्रधानमंत्री मोदी कहलनि, “पहलगम आतंकी हमला सिर्फ भारत पर हमला नहिं छल, बल्कि पूरा मानवता पर हमला छल।”
वर्तमान संघर्ष खास कय ईरान आ इजरायलक बीचक टकराव पर पीएम मोदी कहलनि, “दुनियाकेँ विभिन्न भागमे अनिश्चितता आ संघर्षक असर ग्लोबल साउथक देश पर बहुत खराब प्रभाव पड़ल अछि आ भारत ग्लोबल साउथक आवाजकेँ विश्व पटल पर सुनय केर जिम्मेदारी लेने अछि।
ओ एही बातकेँ सेहो रेखांकित कयलनि कि जँ अंतरराष्ट्रीय समुदाय एकटा टिकाऊ भविष्य लेल गंभीर अछि तँ दुनिया लेल ग्लोबल साउथक प्राथमिकता आ चिंताकेँ समझनाई जरूरी अछि।
अपन संबोधनक दौरान पीएम मोदी कहलनि, ऊर्जा सुरक्षा आबयवला पीढ़ीक सामने आबै वला प्रमुख चुनौतीमे सँ एक अछि। समावेशी विकासक प्रति भारतक प्रतिबद्धताक बारेमे विस्तारसँ बतबैत ओ कहलनि “उपलब्धता, सुलभता, किफायती आ स्वीकार्यता ओ सिद्धांत अछि जे ऊर्जा सुरक्षाक प्रति भारतक दृष्टिकोणक आधार अछि।
ओ एहि बात पर जोर देलनि कि राष्ट्र इंटरनेशनल सोलर एलायंस, कोलिशन फॉर डिजास्टर रेजिलिएंट इंफ्रास्ट्रक्चर, ग्लोबल बायोफ्यूल्स एलायंस, मिशन लाइफ आ वन सन, वन वर्ल्ड, वन ग्रिड जेँका कतेको वैश्विक पहल कएलक आ अंतरराष्ट्रीय समुदायसँ आह्वान कयलनि कि ओकरा आओर मजबूत कयल जाय ।
पीएम मोदी अपन मुख्य भाषणमे तकनीक, एआई आ ऊर्जाक बीच संबंध पर सेहो अपन बात रखलनि।
