आम आदमी पार्टी (आप) केर राष्ट्रीय संयोजक अरविंद केजरीवाल दिल्लीमे बिगड़ैत कानून व्यवस्थाक स्थिति पर भाजपाक नेतृत्व वाला केंद्र सरकार पर हमला तेज कऽ देलनि आ केंद्रीय गृह मंत्री अमित शाहसँ एहि मुद्दा पर चर्चाक लेल बैसारक लेल समय मांगलनि।
दिल्लीक पूर्व मुख्यमंत्री केजरीवाल शाहकेँ लिखल अपन पत्रमे दावा कयलनि जे शहरकेँ देशक “अपराध राजधानी” कहल जा रहल अछि। ओ हालहिमे कतेको स्कूल आ इन्दिरा गाँधी अन्तर्राष्ट्रीय (आईजीआई) हवाई अड्डाकेँ बमक धमकीक सेहो उल्लेख कयलनि।
ई पत्र फरवरी २०२५ मे होबयवला दिल्ली विधानसभा चुनावसँ पहिने आयल अछि। “ई कतेक शर्मनाक अछि जे अहाँक देखरेखमे गौरवशाली राजधानीकेँ कानून आ व्यवस्थाक विफलताक कारण आब ‘रेप कैपिटल’, ‘गैंगस्टर कैपिटल’, ‘ड्रग कैपिटल’ सन नामसँ जानल जा रहल अछि।”
ओ दावा कयलनि जे महिलाक विरुद्ध अपराध बढ़ि रहल अछि, जाहिमे प्रत्येक गलीमे जबरन वसूली गिरोह सक्रिय अछि। ड्रग माफिया पूरा दिल्लीमे अपन पैर पसारने अछि। मोबाइल फोन आ चेन छीनबाक घटनासँ लोक परेशान अछि।
केजरीवाल कहलनि जे पछिला छह मासमे ६०० सँ बेसी स्कूल, १०० सँ बेसी अस्पताल, मॉल आ हवाई अड्डाकेँ बम धमकीक संदेश भेटल अछि। ओ पुछलनि, “अपराधीकेँ गिरफ्तार किएक नहि कएल जा रहल अछि ?”
ओ कहलनि जे दिल्लीमे बच्चा आ ओकर माता-पिता बमक धमकीक कारण भयमे जीबि रहल छथि। की अहाँ कहियो सोचने छी जे जखनि स्कूल खाली भऽ जायत आ छात्रसभकेँ घर पठा देल जायत तखनि बच्चा आ ओकर माता-पिताक की होयत ? ओ कहलनि जे दिल्लीक कानून आ व्यवस्था केन्द्रक नियंत्रणमे अबैत अछि आ जोर देलनि जे शाहकेँ स्थितिकेँ सुधारबाक लेल तत्काल कारवाई आ सहयोग करबाक चाही।
केजरीवाल दावा कयलनि जे महिलाक विरुद्ध अपराध आ हत्याक मामिलामे दिल्ली १९ महानगरमे पहिल स्थान पर अछि। ओ दावा कयलनि जे २०१९ सँ मादक पदार्थसँ सम्बन्धित अपराधमे ३५० प्रतिशतक वृद्धि भेल अछि, प्रतिदिन औसतन तीनटा महिलाक सङ्ग बलात्कार कयल जाइत अछि आ व्यापारीसभसँ नियमित रूपसँ वसूली कयल जाइत अछि।
