अन्तर्राष्ट्रीय दिव्यांग दिवसक अवसर पर मंगल दिन कोसी विकलांग विधवा वृद्ध कल्याण समिति द्वारा डीबी रोड स्थित अपन मुख्य कार्यालयमे दिव्यांगजनकेँ सम्मानित कयल गेल। एहि अवसर पर जिला दिव्यांग सशक्तिकरण विभागक सहायक निदेशक किरण कुमारी एवं सहायक निदेशक जिला सामाजिक सुरक्षा कौशल, राजीव कुमार, दिव्यांगजनकेँ सम्मानित कयलनि।
संस्थान अध्यक्ष विनय भूषण पंजियार कहलनि आई समूचा दुनियामे दिव्यांग दिवस मनाओल जा रहल अछि। संगहि सम्मानित सेहो कयल जा रहल अछि। मुदा आईयो दिव्यांगजनक मासिक पेंशन मात्र चारि सौ रुपैया देल जा रहल अछि। एकरा दिल्ली आ अन्यान्य राज्यक तर्ज पर बढोतरी आवश्यक अछि। संगहि बैंकसँ ऋण प्रदान आ मानसिक गूंगा बहीर एवं दिव्यांगक स्थानीय स्तर पर प्रमाणपत्र जारी करबाक मांग कयलनि। खाद्य योजनाक लाभ देबय आओर भूमिहीन दिव्यांगक आवासीय जमीन देबय केर मांग सेहो कयलनि।
ओ कहलनि जे बिहारमे दिव्यांग, वृद्ध आ विधवाक संख्या आबादीक करीब चालीस प्रतिशत अछि। मुदा सरकार एहि चालीस प्रतिशतक इंतजाम नहि कऽ रहल अछि, भगवान भरोसे पर छोड़ि देल गेल अछि। शारीरिक आ मानसिक रूपसँ विकलांग लोककेँ स्थानीय स्तर पर प्रमाणपत्र आसानीसँ भेट सकैत अछि, मुदा हुनका सभकेँ ताहि लेल पटना जाए पड़ैत अछि।
एहि अवसर पर कोषाध्यक्ष दिलीप साह, सुनील कुमार ठाकुर, शिवराम कुमार शर्मा, उमेश कुमार, कुमरदेव कुमार, सुनील झा, आरती कुमारी, पूनम देवी, शत्रुघ्न साह, अवधेश राम, उपेन्द्र कुमार, दयानंद कुमार, अजय कुमार साह सहित अन्यान्य लोक उपस्थित रहलाह।
