एही सालक अंतमे बिहारमे विधानसभा चुनाव होबयवाला अछि। एहेनमे इंडिया गठबंधनक सीएम चेहरा के होयत, से ल’ क’ कांग्रेसमे घमासान शुरू भ’ गेल अछि।
महागठबंधनक मुख्यमंत्री चेहरा के होयत, से ल’ क’ कांग्रेसमे मतभेद साफ नजर आबि रहल छै। दु दिन पहिने बिहार कांग्रेस प्रभारी कहलनि कि मुख्यमंत्रीक चेहरा इंडिया गठबंधनक बैठकमे मिलजुलि कऽ तय होयत, तिनकर बयान पर बिहार कांग्रेसक विधायक आपसमे भिड़ि गेलथि।
कांग्रेसक एमएलए अजीत शर्मा कहलनि कि महागठबंधनमे सीएम केर चेहरा एखनि तय नहि भेल अछि। मुदा ओतहि दोसर कांग्रेस विधायक मुन्ना तिवारी अजीत शर्माक बयान केर खारिज क’ देलथि। मुन्ना तिवारी कहलथि कि राहुल गांधी पहिनेसँ तेजस्वी यादवकेँ सीएमक चेहरा घोषित क’ चुकल छथि।
मुन्ना तिवारी प्रेस केर संबोधित करैत कहलथि, ‘निर्णय भऽ गेल अछि आ ई कहल जा चुकल अछि जे इंडिया गठबंधन बिहारमे पूरा ताकतसँ चुनाव लड़त।’ मुन्ना तिवारी कहलथि जे दू तरहक बात नहि भ’ रहल अछि। अधिकारिक रूप सँ त’ दिल्लीमे घोषणा कएल गेल छल जे तेजस्वी यादव सीएमक चेहरा होयत त’ इ किएक नहि मानि रहल छथि। मुन्ना तिवारी कहलथि जे हमरा लोकनि मानि रहल छी आ तेजस्वी यादव सीएमक चेहरा हेताह। ओतहि दोसर कांग्रेस नेता तारिक अनवर बयान दैत कहलथि जे बिहारमे जकर बहुमत, ओही पार्टीक सीएम होयत। ओ कहलथि जे जिनकर बेसी विधायक बनत, मुख्यमंत्री सेहो ओहीक बनत। आरजेडी बेसी सीट पर चुनाव लड़त। तँ एहेनमे जीतल त’ ओही दलक सीएम होयत।
