सबलपुर उत्तर माड़र क्षेत्रमे अवैध तरीकासँ संचालित दवाई केर दोकानक खिलाफ मंगलदिन औषधि नियंत्रण प्रशासन पैघ कारवाई कयलक। सहायक औषधि नियंत्रक पंकज कुमार वर्माक नेतृत्वमे कयल गेल एहि छापामारीक दौरान 51 प्रकारक बिना लाइसेंस आ अवैध दवाई बरामद कयल गेल। एहि कार्रवाईमे एक गोटेकेँ गिरफ्तार कयल गेल अछि।
मोरकही थाना केर सहयोगसँ ई कार्रवाई कयल गेल अछि।छापामारीक दौरान एहतेशाम आलम द्वारा संचालित दोकानसँ भारी मात्रामे दवाई बरामद कयल गेल। सब दवाई फॉर्म-16 केर तहत कानूनी तरीकासँ जब्त कयल गेल। औषधि नियंत्रण दलमे खगड़िया केर औषधि निरीक्षक नरेश सिंह, राजाराम मनोहर राय, सरोज कुमार आ पीटीसी-8 टीम शामिल छल। अधिकारी सब कहलनि जे, जब्त दवाई केर संबंधमे जांच जारी अछि आ संबंधित धारा केर तहत मुकदमा चलाबयकेँ प्रक्रिया शुरू भs रहल अछि।
औषधि विभागक अधिकारी सब स्पष्ट कयलनि जे जिलामे अवैध दवाईके कारोबार पर कड़ा नजरि राखल जा रहल अछि आ भविष्यमे सेहो एहेन कारवाई जारी रहत। विभागक उद्देश्य आम जनता केर नकली, बिना लाइसेंस आ असुरक्षित दवाईसँ बचेबाक अछि।
