महाराष्ट्र विधानसभा चुनावक परिणामसँ ई चित्र लगभग स्पष्ट भऽ गेल अछि जे राज्यमे एक बेर फेर महायुतिक सरकार बनय जा रहल अछि। एम्हर उप मुख्यमंत्री आ भारतीय जनता पार्टी (भाजपा) देवेंद्र फडणवीस जनताकेँ धन्यवाद देलखिन आ मुख्यमंत्रीक चेहरा के होएत एहि पर सेहो बात कयलनि।
मुख्यमंत्रीक चेहराक बारेमे ओ कहलनि, “महाराष्ट्रक जनता देखेलक अछि कि एकनाथ शिंदेक नेतृत्वेवाला पार्टी बालासाहेब ठाकरेक असली शिवसेना अछि। मुख्यमंत्रीक चेहरा पर कोनो विवाद नहि होयत। पहिल दिनसँ ई निर्णय कयल गेल जे चुनावक बाद तीनू दलक नेता एक सङ्ग बैसि एहि पर निर्णय लेताह। फैसला सबके स्वीकार्य होएत। ओहि पर कोनो विवाद नहि अछि। महायुति गठबन्धनमे एकनाथ शिंदेक नेतृत्ववला शिवसेना, अजित पवारक नेतृत्ववला राष्ट्रवादी कांग्रेस पार्टी आ भाजपा सम्मिलित अछि।”
पत्रकारसँ बातचीत करैत फडणवीस कहलनि, “महाराष्ट्र विधानसभा चुनावक परिणाम देखबैत अछि जे राज्य प्रधानमंत्री नरेन्द्र मोदीक समर्थन करैत अछि। ओ महिला मतदाताकेँ सेहो धन्यवाद देलखिन। फडणवीस कहलखिन, “गलत खबरक प्रचार आ धर्मक आधार पर मतदाताक ध्रुवीकरण करय केर विपक्षक प्रयास केर जनता विफल कऽ देलक अछि।मतदाता, भाजपा टीम आ पार्टी नेताक समर्थनक कारण विपक्षक चक्रव्यूह तोड़यमे सफल रहलहुँ।”
भाजपा नेता कहलनि, “हम महाराष्ट्रक जनताक सामने नमन आ प्रणाम करैत छी। मोदी जी ‘एक हैं तो सेफ हैं’ केर नारा देलखिन। महाराष्ट्र एहि नाराकेँ सफल बनौलक। सोशल मीडिया प्लेटफॉर्म एक्स पर एकटा पोस्टमे फडणवीस लिखलनि, ‘एक हैं तो सेफ हैं, मोदी है तो मुमकिन हैं।'”
झारखंड चुनावक नतीजाक बारे मे पूछला पर फडणवीस कहलनि, “सबसँ पहिने हम संजय राउत पर कोनो प्रतिक्रिया नहि दैत छी। मुदा हम आइ प्रतिक्रिया दए रहल छी किएक तँ ई जरूरी अछि।हम जनैत छी जे झारखंड मुक्ति मोर्चाक जीत भेल अछि आ बहुत वैध तरीकासँ जीतल अछि। पूर्णतः निष्पक्ष चुनाव भेल। चुनाव आयोग बढ़िया काज कयलक अछि। ओतय ईवीएम एतेक मजबूत छल जे ओकरा हैक नहिं कयल जा सकैत छल। ओतय लोकतंत्रक जीत भेल अछि आ महाराष्ट्रमे हमरा सभकेँ भारी जीत भेटल अछि, तऽ चुनाव आयोग पक्षपाती भऽ गेल अछि। ईवीएम एतय हैक कएल गेल छल। अईठाम लोकतंत्रक हत्या भेल अछि। देखू, कखनहु-कखनहु आत्मनिरीक्षण करबाक जरूरत पड़ैत अछि।”
राज्यक २८८ विधानसभा सीटक लेल २० नवम्बरकेँ एकहि चरणमे मतदान भेल छल। तीन दिन बाद, ई परिणाम आइ सामने आयल अछि। महायुति गठबन्धन भारी जीत भेल अछि।
