महाराष्ट्रक उपमुख्यमंत्री एकनाथ शिंदे रवि दिन विपक्ष पर प्रहार कयलथि। ओ विपक्ष पर आरोप लगओलनि जे ओ इलेक्ट्रॉनिक वोटिंग मशीनक विषयमे लोककेँ गुमराह कऽ रहल अछि आ लोकक जनादेश स्वीकार नहि कऽ रहल अछि। पत्रकारसँ बातचीत करैत शिंदे कहलनि जे विधानसभा चुनावमे महायुतिक जीत कठिन परिश्रमक कारण भेल अछि आ महा विकास अघाड़ीकेँ जनताक जनादेश स्वीकार करय पड़त। विकास काजमे हुनका सरकारक सहयोग करय पड़त।
महायुति (भाजपा, शिवसेना आ एनसीपी) विधानसभा चुनावमे २८८ सीटमेसँ २३० सीट जितलक। महा विकास अघाड़ी (एमवीए) मात्र ४६ सीट जितलक। विधानसभा चुनावमे हारिक बाद विपक्ष ईवीएमसँ छेड़छाड़ करबाक आरोप लगओलक आ मतपत्रक उपयोगक माँग कयलक।
विपक्ष पर प्रहार करैत शिवसेना प्रमुख एकनाथ शिंदे कहलखिन, “जखन अहाँ जीतैत छी तखन ईवीएममे खराबी नहि होइत अछि। मुदा जखन अहां हारि जाइत छी तखन मशीन खराब भऽ जाइत अछि। ई सही दृष्टिकोण नहि अछि।
ओ कहलनि जे विपक्षकेँ जनताक जनादेश स्वीकार करय पड़त। जनता विपक्षकेँ अपन जगह देखा देलक अछि। जनता कहलक अछि जे ओ ओहि लोककेँ वोट नहि दैत जे मात्र अपन घरमे बैसल रहैत अछि।
एकनाथ शिंदे सवाल पुछलनि, “लोकसभा चुनावमे महायुतिकेँ २.४८ करोड़ वोट भेटल, जे ४३.५५ प्रतिशत अछि। एमवीएकेँ २.५ करोड़ वोट भेटल, जे ४३.७१ प्रतिशत छल। तइयो विपक्षकेँ ३१ सीट आ महायुतिकेँ १७ सीट भेटल। की हम कहलहुं जे ईवीएम घोटाला अछि ?” ओ पूछलनि जे लोकतांत्रिक रूपसँ निर्वाचित सरकारक बारे मे भ्रम पैदा करब लोकतंत्र लेल नीक नहि अछि।
आगू ओ कहलनि, “जनता हमरा सभकेँ अपन काजक लेल फेरसँ चुनलक। कानब बंद करू आ सत्य स्वीकार करू। ओ सवाल कयलनि जे ईवीएम मुद्दाक विरोधमे शनिदिन शपथग्रहण समारोहक बहिष्कार कयनिहार विपक्षी दलक सदस्य रविदिन विधायकक रूपमे कोना शपथ लेलनि। “की एकर मतलब ई अछि जे पार्टी एहि मुद्दाकेँ छोड़ि देलक ?”
शिंदे कहलनि जे झारखण्डमे विधानसभा चुनाव आ महाराष्ट्रक नांदेड़ आ केरलक वायनाड लोकसभा सीटक उपचुनाव विपक्ष जीतलक। ओ कहलखिन, “नहि कोनो अवैध काज होयत आ ने ककरो संग अन्याय होयत। सरकार संविधानक अनुसार काज करैत अछि।
शिंदे के ई बयान एनसीपी-सपा प्रमुख शरद पवारक ओहि बयानक बाद आयल अछि जाहिमे ओ राजनीतिक दल द्वारा देल गेल वोट आ महाराष्ट्र विधानसभा चुनावमे जीतल सीटक बीच तुलना आश्चर्यजनक छल। महाराष्ट्रक मुख्यमंत्री देवेन्द्र फडणवीस कहलनि जे वरिष्ठ नेताक रूपमे शरद पवारकेँ देशकेँ गुमराह नहि करबाक चाही।
