बृहस्पतिकेँ अपन बयानमे हाजीपुर लोकसभा सीट सँ उम्मीदवार चिराग पासवान तेजस्वी यादवकेँ कानूनी कारवाईक चेतावनी देलनि। हालहिमे तेजस्वी यादव आरक्षण पर चिराग पासवान पर हमला कयने छलाह, जकर जवाबमे लोजपा (रामविलास) केर राष्ट्रीय अध्यक्ष कहलनि कि तेजस्वी यादव झूठ बाजि रहल छथि।
चिराग पासवान कहलनि जे तेजस्वी यादवक आरक्षणक बारेमे हमरा पर गलत बयान देब बंद करय केर चाही, नहिं तऽ हमरा कानूनी कारवाई करय पड़त। ओ चिराग पासवानक बारेमे एकटा भ्रम पसारय केर कोशिश कऽ रहल छथि। सभ मंचसँ कहि रहल छथि जे चिराग पासवान कहलनि कि समृद्ध दलितक आरक्षण समाप्त हेबाक चाही।
चिराग पासवानक बयान जे जँ तेजस्वी यादव २०२० मे एक संग लड़ैत तऽ तेजस्वी यादवकेँ दहाईक आंकड़ा तक नहिं भेटैत। एहि पर कटाक्ष करैत तेजस्वी यादव हालेमे चिराग पासवान पर हमला कयलथि। तेजस्वी यादव कहने छलाह जे अपन बात छोड़ि दियौक। चिराग पासवान कहैत छथि जे जे समृद्ध दलित छथि हुनका आरक्षण छोड़बाक चाही। तखन ओ (चिराग) आरक्षण किएक नहिं छोड़ैत छथि ? आगू तेजस्वी कहने छलथि जे “चिराग पासवान बेंगलुरुमे की भऽ रहल अछि, कर्नाटकमे की भऽ रहल अछि, एहि पर नहिं बाजि रहल छथि। जखन भाजपा नेता बाबासाहेब अम्बेडकरक संविधान समाप्त करबाक प्रयास कऽ रहल छथि तखन हुनकर मुंह नहिं खुजि रहल अछि। एहि बयानक बाद चिराग आब कानूनी कारवाईक चेतौनी देलनि अछि।
