आइ सीएम नीतीश कुमारक राज्यसभाक सदस्यक शपथ, पुनः 2-3 दिनमे सीएम पदसँ त्याग पत्र : विजय चौधरी
पटना । समदिया
दू दशक धरि बिहारक कमान सम्हारयबला सीएम नीतीश कुमार काल्हि दिल्ली प्रस्थान क’ चुकल छलथि। ओ आइ 10 अप्रैलकेँ राज्यसभा सदस्यक रूपमे शपथ लेथिन। एकर बाद जल्दीए मुख्यमंत्री पदस इस्तीफा केर घोषणा क’ देथिन। एहि बीच हुनक पार्टीक नेता विजय चौधरी एकटा बयान देलन्हि।
विजय चौधरी कहलन्हि जे राज्यसभा सांसदक रूपमे शपथ लेलाक बाद मुख्यमंत्री नीतीशजी पदसँ इस्तीफा द’ देथिन। 2-3 दिन प्रतीक्षा करू। पूरा एनडीए एक संग ई कहि रहल अछि। चाहे भाजपा केर नेता होइ वा अन्य सहायक दलक नेता होइ, सभ एक सुरमे कहि रहल छथि जे नीतीश कुमार जे बिहारमे 20 बरखमे काज कयने छथि, तकरा हम आगु बढ़ाएब। ‘नीतीश मॉडल’ केर तहत बिहार जे ऊँचाई प्राप्त कएलक, जकर अनुसरण अन्य राज्यक लोक सेहो करैत छथि, ओही दिशामे हम आगु बढ़ब। हमरा नीतीश कुमारक विरासतकेँ आगु ल’ जाए पड़त। ओ कहलकनि जे निशांत कुमार पहिनेसँ पार्टी सं जुड़ि गेल छथि आ ओ पार्टीमे सक्रिय भूमिका निभेताह।
विदित अछि जे 20 साल धरि रहल बिहारक मुख्यमंत्री नीतीश कुमार राज्यसभासँ अपन नव पारी शुरू करय जा रहल छथि। काल्हि दुुपहरियामे ओ दिल्ली रवाना भऽ गेल छलाह। आइ 10 अप्रैलकेँ ओ राज्यसभा सदस्य केर रूपमे शपथ लेताह। सीएम नीतीश कुमार लेल शपथ ग्रहण समारोह केर आयोजन कयल गेल अछि। एकरि लेल सभ तैयारी पूरा भऽ चुकल अछि। पटना एयरपोर्ट पर काल्हि जदयूक राष्ट्रीय कार्यकारी अध्यक्ष संजय झा कहलनि जे 10 अप्रैलकेँ दुुपहर सवा 12 बजे मुख्यमंत्री नीतीश कुमारक शपथ सांसदक रूपमे सदनमे होयत।
