आइ ०९ अक्टूबर ‘मिथिलाक्षर दिवस’ अछि। एहि मिथिलाक्षर दिवसक अवसर पर २५ सितंबरसँ ‘मिथिलाक्षर पक्ष’ चलि रहल अछि, जाहिमे मिथिलाक्षर साक्षरता अभियानी मिथिलाक्षर लेखनक संग रंग-बिरंगक प्रस्तुती दैत आबि रहल छथि आ तकर आइ मुख्य दिवस अछि।
मिथिलावासी प्रत्येक साल मिथिलाक्षर दिवस अर्थात ०९ अक्टूबरकेँ ट्विटर ट्रेंड राखैत छथि आ एहि केर माध्यमसँ मिथिला-मैथिलीक विभिन्न समाधाक लेल ट्रेंडमे ट्वीट कय सरकारक समक्ष मांग रखैत छथि।
एहि बेरक मुख्य मांगक विषयमे जखनि मैपुप्र समदिया अभियानक संस्थापक अजय नाथ झा शास्त्रीसँ जिज्ञासा कयलक तऽ शास्त्री कहलनि जे एहि बेरक ट्विटर ट्रेंडक मुख्य पांच टा विन्दु अछि आ एकर मांग ट्वीट द्वारा जोर-शोरसँ मिथिलावासी उठेताह, जे एहि प्रकारसँ अछि :-
०१) ‘मिथिलाक पहिचान मिथिलाक्षर निशान’ अभियानक आलोकमे बिहारक २४ जिला आ झारखंडक ०६ जिला अर्थात तीसो जिलावाला मिथिला क्षेत्रक स्थान आदिक नामक सार्वजनिक बोर्डमे मिथिलाक्षरमे सेहो लिखल जयबाक व्यवस्था होय।
०२) नव शिक्षानीति २०२० मे स्पष्ट कहल गेल अछि जे, प्राथमिक वर्गमे पढ़ौनीक माध्यम सभक क्षेत्रीय भाषा अर्थात स्थानीय भाषा यानि मातृभाषा होय, तऽ बिहारक २४ जिला आ झारखंडक ०६ टा जिला अर्थात मिथिला क्षेत्रक तीसो जिलाक विद्यालयमे अविलंब प्राथमिक वर्गक पढ़ौनीक माध्यम मैथिली होय आ ताहि लेल पाठ्य सामग्री, शिक्षक आदिक व्यवस्था कयल जाय।
०३) मिथिला क्षेत्रमे संपर्क भाषा हिन्दी आ अंग्रेजीक पत्र-पत्रिका सरकारी सहायताक श्रेणीमे अछि, मुदा मूल माटिक स्थानीय भाषा मैथिलीक पत्र-पत्रिकाकेँ सरकारी सहायताक श्रेणीमे नहिं रखने अछि, ई कतेक पैघ अपमान दस करोड़ मिथिलावासीक लेल अछि, तें राज्य सरकार शिघ्र मैथिली पत्र-पत्रिकाकेँ सरकारी सहायताक श्रेणीमे आनय।
०४) मैथिलीकेँ शास्त्रीय भाषाक दर्जा अविलंब भेटय।
०५) मिथिला क्षेत्रमे शत-प्रतिशत शिक्षा सुनिश्चित करय केर सरकारक पहल होय।
संगहि समस्त मिथिलावासीसँ आह्वान कयलनि जे भारी संख्यामे ट्वीट कय सरकारक ध्यान आकृष्ट करय पर बाध्य करथि। ट्विटर ट्रेंडक समय दुपहरि ०२:०० बजेसँ ०४:०० बजे तक राखल गेल अछि।
