हँ, पाँचम वर्षमे प्रवेश कयलक अहाँक ई ‘मैथिल पुनर्जागरण प्रकाश (राष्ट्रीय मैथिली दैनिक) : शास्त्री
निज समदिया!! लगातार चारि सालक सतत निरंतर सफलतापूर्वक प्रकाशन पूरा कय आइ २६-१२-२०२५ केँ ई मैथिली अखबार पाँचम वर्षमे प्रवेश कयलक अछि।
एहि अवसर पर एकर प्रकाशक अजय नाथ झा शास्त्री कहलनि जे, “कोनो व्यक्तिक मायकेँ अचानक कोनो गंभीर रोग भऽ जाए तऽ संतान ई नहिं सोचैत छैक जे कोना एकर समाधान होएत, बल्कि ओ सीधा ओकर उपचारमे लागि जाइत अछि आ अपन पूरा यत्न झोंकैत रहैत अछि। इएह हाल भेल छल आ दस करोड़क मिथिलावासीक अपन मैथिली भाषाक एकटा निरंतर चलैत अखबार नहिं छल। समस्या छलैक, कारण ई सरकारसँ बारल काज छलैक, तखनि एहेन साहस कोना कियो कय सकैत अछि। मुदा नियति निमित्त बना ई काज शुरू करबेलक। सोचल गेल रहय जे सरकार ने नहिं करतै सहयोग, ई जे हजारक हजार मैथिलीक संगठन सभ अछि, हाथों-हाथ लऽ लेत एहि मैथिली अखबारकेँ , मुदा वास्तविकतासँ अनभिज्ञ छलौंह। तथापि किछु माटिक अपन सपूतकेँ निमित्त बना ओ अदृश्य शक्ति एकरा गतिशील रखने अछि।”
शास्त्री आगू जनतब देलनि जे आब ई अखबार “मैथिल पुनर्जागरण प्रकाश फोरम ” द्वारा संचालित भऽ रहल अछि, जे फोरम कंपनी अधिनियम एवं सेक्शन आठमे रजिस्टर्ड अछि। संगहि संग फोरम द्वारा नहिं मात्र ई मैथिली अखबार बल्कि ‘मिथिलाक्षर साक्षरता अभियान’ सहित १३ टा लगभग उपक्रम संचालित अछि। ”
पाँचम स्थापना दिवस पर अपन अनंत शुभकामना व्यक्त करैत सभ प्रकारसँ एहि प्रकाशन यात्राक सहयोगीकेँ धन्यवाद एवं आभार व्यक्त कयलनि।
संगहि संग एहि फोरमकेँ जानय लेल समस्त मिथिलावासीकेँ आह्वान कयलनि, २०२६ मिथिला-मैथिलीक साल होए तकरा लेल संकल्पित भऽ फोरममे अपन विश्वास देखाबैत बल प्रदान करय केर आह्वान कयलनि।
मैथिली अखबार ‘मैथिल पुनर्जागरण प्रकाश (राष्ट्रीय मैथिली दैनिक)’ केर पाँचम वर्षमे प्रवेश पर सभगोटेकेँ हार्दिक शुभकामना एवं अभिनंदन।
