जम्मू कश्मीरक पहलगाममे आतंकवादी हमलामे बिहारक इंटेलिजेंस ब्यूरोक अधिकारी मनीष रंजनक जान चलि गेल। आतंकवादी मनीष रंजनकेँ पत्नी आ बच्चाकेँ सामने हुनका गोली मारलक।
जम्मू-कश्मीरक पहलगाममे मंगलदिन भेल आतंकवादी हमलाक शिकार भेल इंटेलिजेंस ब्यूरोक अधिकारी मनीष रंजन रोहतास जिलाक निवासी रहथि। मनीष रंजन मूल रूपसँ जिलाक करगहर थाना क्षेत्रक अरूहीं गामक रहनिहार रहथि। सासारामक गौरक्षणी मोहल्लामे हुनकर एकटा व्यक्तिगत मकान सेहो छनी, जतय हुनकर चाचा-चाची रहय छथि। मनीष रंजन अपन पत्नी आओर दू बच्चा संग कश्मीर घूमय गेल रहथि जतय आतंकवादी पहलगाममे हुनका बच्चा आ पत्नीक सामने गोली मारिकय हत्या कए देलक।
मनीषक चाचा आलोक कुमार कहला कि मनीष रंजनक विवाह इलाहाबादमे 2010 मे भेल छल आ हुनका एकटा पुत्र आ एकटा पुत्री अछि। मनीष हैदराबादमे नियुक्त छलाह आ अपन माता-पिताक संग पश्चिम बंगालक झालदामे रहैत छलाह। घटनाक जानकारी हुनका बीतल रात नौ बजे भेटल, जखन हुनका टीवी पर आतंकिक हमलाक जानकारी भेटल। ओ साफ शब्दमे कहलन्हि जे ओ न्याय चाहैत छथि आ आतंकीक समूल नाश कएल जाए।
हैदराबादमे आईबी अधिकारीक रूपमे कार्यरत मनीष रंजन तीन भाइमे सबसँ पैघ छलथि। एकटा भाई विनीत रंजन एक्साइज विभागमे अधिकारी छथि, जिनकर पोस्टिंग झारखंडमे अछि, जखनि कि दोसर भाई राहुल रंजन छत्तीसगढ़केँ अंबिकापुरमे फूड इंस्पेक्टर छथि। मनीषक पिता मंगलेश मिश्रा एकटा सेवानिवृत्त शिक्षक छथि, जे बंगालक पुरुलिया जिला अंतर्गत झालदा हाई स्कूलमे शिक्षक छलथि। मनीष अपन माता-पिताक संग बंगालमे रहैत छलथि, मुदा हिनकर पोस्टिंग हैदराबादमे छल। घटनाक बादसँ परिवारमे कोहराम मचल अछि आ सभ मनीषक पत्नी आ बच्चा सभक लेल सेहो चिंतित छथि।
