केंद्रीय गृह मंत्री अमित शाह बृहस्पतिकेँ जानकारी देलथि जे हुर्रियत कॉन्फ्रेंससँ जुड़ल दूटा संगठन सभ अलगाववादकेँ त्यागि देलन्हि आ प्रधानमंत्री नरेंद्र मोदीक नव भारतमे अपन विश्वास जतौलन्हि।
ओ कहलनि जे मोदी सरकारक अधीन अलगाववाद अपन अंतिम साँस लऽ रहल अछि आ सम्पूर्ण कश्मीरमे एकताक विजयक गूंज सुनाइ दैत अछि।केंद्रीय गृह मंत्री अमित शाह सोशल मीडिया प्लेटफॉर्म एक्स पर लिखलथि, “कश्मीर घाटीसँ एकटा आओर पैघ खुशखबरी। हुर्रियतसँ जुड़ल दूटा आओर समूह, जेएंडके तहरीक-ए-इस्तिकलाल आ जेएंडके तहरीक-ए-इस्तिकामत, अलगाववादकेँ त्यागि देलन्हि आ प्रधानमंत्री नरेंद्र मोदीक नव भारतमे अपन विश्वास जतौलन्हि। मोदी सरकारक अधीन अलगाववाद अपन अंतिम साँस लऽ रहल अछि आ सम्पूर्ण कश्मीरमे एकताक विजयक गूंज सुनाइ दैत अछि।”
एहिसँ पहिनहि गृह मंत्री अमित शाह मंगल दिन जानकारी देलथि जे हुर्रियत कॉन्फ्रेंसक दूटा समूह जम्मू आ कश्मीर पीपुल्स मूवमेंट (जेकेपीएम) आ डेमोक्रेटिक पॉलिटिकल मूवमेंट द्वारा अलगाववादसँ सभ संबंध तोड़बाक घोषणा कएलक। एकर जानकारी दैत गृह मंत्री अमित शाह सोशल मीडिया प्लेटफॉर्म एक्स पर लिखने छलाह, “कश्मीरमे अलगाववाद इतिहास बनि चुकल अछि। मोदी सरकारक एकीकरणकारी नीतिसँ जम्मू-कश्मीरसँ अलगाववाद समाप्त भऽ गेल अछि। हुर्रियतसँ जुरल दूटा संगठन अलगाववादसँ सब संबंध तोड़बाक घोषणा कएलक अछि। हम भारतक एकताकेँ मजबूती प्रदान करबाक दिशामे एहि डेगक स्वागत करैत छी आ एहेन सभ समूहसँ आग्रह करैत छी जे ओ आगू आबय आ अलगाववाद केर सदाक लेल खत्म करय। ई प्रधानमंत्री नरेंद्र मोदीजीक विकसित, शांतिपूर्ण आ एकीकृत भारतक निर्माणक दृष्टिकोणक पैघ जीत अछि।”
एकर पहिने केंद्रीय गृह मंत्री अमित शाह संसदमे बतेलथि जे घाटीसँ आर्टिकल-370 हटलाक बाद भारतीय युवाक आतंकवादिसँ जुराब लगभग खत्म भऽ गेल अछि। 10 वर्ष पहिने जम्मू-कश्मीरमे आतंकवादी सभक महिमामंडन होइत रहल, जनाजाक जुलूस निकालल जाइत रहल। हमर समयमे सेहो आतंकवादी मारल गेल, बेसी मारल गेल, मुदा कोनो जनाजाक जुलूस नहि निकालल गेल। जे आतंकवादी जतय मरल, ओतहि दफना देल जाइत अछि।
