रेड क्रॉस दिवसक अवसर पर बुधदिन रेड क्रॉस सोसाइटी परिसरमे अध्यक्ष डॉ. अबुल कलाम द्वारा रेड क्रॉसक झंडा फहराओल गेल। रेड क्रॉस सोसाइटीक सभागारमे मौजूद अधिकारी, प्रबंधन समितिक सदस्य आर स्वयंसेवक लोकनि रेड क्रॉसक संस्थापक सर हेनरी डयूनान्टक चित्र पर फूल चढा श्रद्धांजलि देलनि। एहि अवसर पर विभिन्न प्रखंडक स्वयंसेवक, दीपक कुमार, अनिता कुमारी, अविनाश चौधरी, मो बेलाल, मो असदुल्लाह, मो जमीरुद्दीनक उत्कृष्ट काज लेल उपहार दऽ कऽ सम्मानित कयल गेल। ई कार्यक्रम मुख्यालय, नई दिल्लीसँ अध्यक्ष डॉ. अबुल कलाम आ कोषाध्यक्ष रामजी प्रसाद द्वारा प्रसारित कयल गेल। जाहिमे मानवता पर आधारित मानवीय विचार आर सर हेनरी डयूनान्टक महत्वपूर्ण प्रसिद्धि मानवताक प्रति समर्पित छल। मानवताक प्रति हुनक सेवाक विस्तृत जानकारी देलनि। कार्यक्रमक समापन प्रबंधन समितिक सदस्य डॉ. खुर्शीद आलमक धन्यवाद ज्ञापनक संग भेल। एहि अवसर पर रेडक्रॉस प्रबंधन समितिक सदस्य जगन्नाथ चौधरी ‘गोपाल’ आ स्वयंसेवक मुकेश कुमार सिंह रक्तदान शिविरमे आयोजनकेँ सफल बनेबाक लेल रक्तदान सदर अस्पतालक आयोजनमे महत्वपूर्ण भूमिका निभेलनि। एहि अवसर पर प्रबंधन समिति सदस्य किशोर कुमार, मो.फिरोज आलम, कार्यालय सहायक रहमान आलम, मो मोती, भूपेन्द्र मुखिया, मुरारी प्रसाद, प्रेम कुमार उपाध्याय आ मो लड्डन सहित अन्यान्य लोक उपस्थित रहलाह। एहि आयोजनक अंतमे आगंतुक लोकनिक बीच स्नैक्स आ मिठाई वितरण कार्यक्रमक बाद समापन भेल।
