आगि लगलाक बाद घरक लोक अपन जान बचाबय लेल भागल आ अपन मवेशी सभकेँ सुरक्षित निकालबामे सेहो सफल रहल। लगपासक लोकसभ आगि पर काबू पाबय लेल बहुत प्रयास कयलनि, मुदा आगि तेजीसँ पसरि गेल आ एकक बाद एक कतेको घर घिर गेल। आगि लगबाक सूचना भेटैत बेनीबाद थानाक प्रभारी अभिषेक कुमार घटनास्थल पर पहुँचलाह। एकर बाद गाईघाट सीओ शिवांगी पाठकके जानकारी देल गेल। एकर बाद घटनाक जानकारी अग्निशमन विभागके देल गेल।
लगभग दू घंटाक कठिन परिश्रमक बाद आगि पर काबू पाबि लेल गेल। घटनास्थल पर उपस्थित लोकक अनुसार, जखनि अग्निशमन विभागक गाड़ी घटनास्थल पर पहुँचल, लगभग सभ घर जरि कऽ राख भऽ गेल छल। आगिसँ प्रभावित परिवारमे राजेश राय, मुकेश राय, राकेश यादव, राम सुन्दर यादव सहित लगभग एक दर्जन परिवार सम्मिलित अछि। प्रखण्ड प्रमुख श्रवण कुमार सिंह आ गाईघाटक विधायक निरंजन राय सभ पीड़ित परिवारकेँ क्षतिपूर्तिक सङ्ग-सङ्ग अन्य मदतिक माँग कयलनि अछि। सीओ शिवांगी पाठक कहलनि जे ओ स्वयं राजस्व कर्मचारीक सङ्ग एहि घटनाक जाँच कऽ रहल छथि। जाँच रिपोर्ट आबि गेलाक बाद नियमानुसार सभ पीड़ित परिवारकेँ क्षतिपूर्तिक राशि देल जायत।
