बिहार विधानसभा चुनावसँ पहिने मुख्यमंत्री नीतीश कुमार कतेको विभागमे मानदेय बढ़ा देलनि अछि। तँ आब स्वास्थ्य विभागक दिसिसँ प्राथमिक स्वास्थ्य केंद्रमे काज करय वला योग प्रशिक्षक सभ सेहो अपन मानदेय बढ़ाबय केर मांग करैत हड़ताल पर चलि गेल छथि।
सोमदिन भाजपा कार्यालयक गेट पर भारी संख्यामे योग प्रशिक्षकक घंटा धरि विरोध प्रदर्शन कयलनि। ओ कहलनि जे हमरा सबकेँ 2018 मे बहाल कयल गेल अछि आ हमरा सबकेँ प्रतिदिन 250 रुपया देल जाइत अछि जे साढ़े सात हजार रूपया प्रति माह अछि। मुख्यमंत्री सबहक मानदेय बढ़ा रहल छथि। हमरा सब पर कहिया ध्यान देथिन।
भागलपुरक एगो योग प्रशिक्षक कहलनि कि कोरोना केर समयमें हम अपन जान जोखिममे डालि कय लोककेँ योग करा रहल छलौंह। तहियासँ हमरा सबकेँ 100 रुपयाक वेतन भेटैत अछि। 250 प्रतिदिन। प्राथमिक स्वास्थ्य केंद्रमे बहुत लोक 10-15 किलोमीटरक दूरीसँ अबैत छथि, जे यात्रा किराया पर खर्च होइत अछि। तखनि 100 रुपैयाक मासिक वेतनमे कोना काज करब।
एकटा आओर प्रशिक्षक कहलनि जे, “हम सभ एहि लेल सेहो कतेको बेर विरोध प्रदर्शन कयने रही। स्वास्थ्य मंत्री मंगल पांडेसँ सेहो कतेको बेर भेंट कयने रही आओर ओ सेहो आश्वासन देने छलाह, मुदा ई सिर्फ आश्वासन छल। योग प्रशिक्षकक भर्तीक सेहो बात भेल छल, मुदा ओहो ताक पर राखल गेल।”
प्रदर्शनकारीक कहब छल जे आब जखनि मुख्यमंत्री नीतीश कुमार कतेको विभागमे लगातार मानदेय बढ़ा रहल छथि तखनि हमरा सब पर कोनो ध्यान किएक नहि देल जा रहल अछि। एहि ध्यान आकर्षित करय लेल हम सब भोर 5 बजेसँ भाजपा कार्यालयमे अपन स्वास्थ्य मंत्री मंगल पांडेयसँ भेंट करय लेल आयल छी।
ओ सब कहलनि जे स्वास्थ्य मंत्री एखनि धरि नहि पहुंचल छथि, मुदा हम सब एतय साँझ 5 बजे धरि रहब। हम सब कोनो हालतमे अपन मंत्रीसँ भेंट करब। जखनि सबहक मांग पूरा भऽ रहल अछि तखनि हमरा सब पर सेहो ध्यान देल जाय। ओना ई पाँच सूत्रक मांग अछि, मुदा मुख्य मांग अछि जे हमर मानदेय बढ़ाओल जाय।
जनतब देब जे चुनावी सालमे मुख्यमंत्री नीतीश कुमार आम लोकक लेल सामाजिक सुरक्षा पेंशन बढ़ा देलनि आओर स्कूलक रसोइया आओर नाइट वॉचमैनक मानदेय दुगुना कय देलनि। शारीरिक शिक्षकक मानदेय सीधा 8000सँ बढ़ा कय 16000 कय देल गेल।
