संसदमे चलि रहल मानसून सत्रमे गृह मंत्री अमित शाह मंगलदिन ‘ऑपरेशन सिंदूर’ पर विपक्ष द्वारा उठाएल सवालक जवाब देलनि। गृह मंत्रीक जवाब पर पक्ष-विपक्षक सांसद सभक अपन-अपन प्रतिक्रिया देलनि।
भाजपा सांसद रवि शंकर प्रसाद कहला, “गृह मंत्रीक भाषण ऐतिहासिक छल। हम संसदमे कतेको दिनसँ छी। जाहि प्रकारसँ ओ ऐतिहासिक, राजनीतिक आ डिप्लोमैटिक रणनीतिक बात सभ कहला, सुरक्षा, कश्मीर आ चीनक विषय पर, ओ देशक समक्ष अपन बात रखलनि। चीन आ कश्मीरक लक्षण पर कांग्रेस पार्टीक समस्त इतिहास देशक समक्ष बतौलनि। संगहि आतंकवादक खिलाफ कतेक सख्त कार्रवाई भेल अछि, सेहो बतौलनि। एहि लेल हुनकर अभिनंदन करैत छी।”
कांग्रेस सांसद इमरान प्रतापगढ़ी कहला, “देश आइ ई जानय चाहैत अछि जे जम्मू-कश्मीरक पहलगाम जकाँ महत्वपूर्ण पर्यटन स्थल पर, जतय हजारों सैलानी उपस्थित छल, ताहि ठाम सुरक्षा बलक अनुपस्थितिक कारण की छल ? चारि आतंकवादीक घुसब, 26 निर्दोष लोकक मृत्युक घटना आ घंटों धरि गोलीबारी चलनाइ, एकर जवाबदेही ककर अछि ? सरकारक उत्तर शब्दक भ्रमजालसँ भरल लगैत अछि। हुनका लगैत अछि जे एहिसँ विपक्ष वा देश संतुष्ट भऽ जाएत, मुदा एहेन नहि अछि। विपक्ष कोनो नव प्रश्न नहि उठा रहल अछि। वैऽह पुरान प्रश्न पुछि रहल अछि, जे देशक जनता पुछि रहल अछि।
ओ कहलनि, “ई सच अछि जे आतंकवादी मारल गेल अछि, आ हम भारतीय सेना आ सुरक्षा बलक साहसकेँ सलाम करैत छी। बर्फीला क्षेत्रमे अपन जान जोखिममे डालि कऽ ओ सभ समय देशक सीमाक रक्षा करैत छथि।” मुदा प्रश्न ई अछि जे आतंकवादीकेँ रोकथाममे चुक कतय भेल। की अमेरिकामे बैसि कऽ डोनाल्ड ट्रंप ई तय करत जे भारतक सेना आगू बढ़त वा रुकत। इतिहासमे निक्सन सेहो एहने सोचने छल, जखनि ओ सातम बेड़ा भेजने छल। मुदा इंदिरा गांधी स्पष्ट कहलनि जे भारत नहि रुकत, चाहे सातम बेड़ा होय वा आठम। त’ की आइ व्यापारिक दबावक कारण भारतकेँ रोकि देल गेल ? की प्रधानमंत्री ई उत्तर देताह जे ओ ट्रंपक कहला पर युद्धविराम नहि कएलन्हि।”
कांग्रेस सांसद गौरव गोगोई कहला, “गृह मंत्री अमित शाह पहलगाम हमलामे अपन मंत्रालय आ खुफिया तंत्रक नाकामीक लेल पीड़ित विधवा सभसँ’ कहियो माफी नहि मांगलथि। जम्मू-कश्मीरक उपराज्यपाल मनोज सिन्हा मानलैन जे पहलगाममे सुरक्षा चूक भेल छल, मुदा गृह मंत्री अमित शाहमे एतेक साहसो नै छल जे ओ ई सुरक्षा चूक मानि लैथ। डेढ़ घंटाक अपन भाषणमे ओ पंडित नेहरू आ 1948 केर बात कएलथि। ओ इंदिरा गांधी आ 1971 केर जिक्र कएलथिन। ओ डॉ. मनमोहन सिंह आ राजीव गांधीक नाम लेलनि। मुदा, सत्य ई अछि जे पहलगाम हमला पंडित नेहरू, डॉ. मनमोहन सिंह, सोनिया गांधी या राहुल गांधीक कारण नै भेल। ई अपनेक नाकामीक कारण भेल।”
ओ आगू कहलनि, “आइ गृह मंत्रीकेँ राजधर्मक पालन क’ अपन गलती स्वीकारि लेबाक चाही छल। मुदा हुनका पहलगामक विधवासँ खुफिया नाकामीक लेल माफी मांगय केर नैतिक साहस नै छल, आ नै नैतिक जिम्मेवारी स्वीकार करय केर हिम्मत। ओ अपन भाषणमे हमर सेहो जिक्र कएलथि आ कहलथि जे हम पाकिस्तान गेल छलहुँ। गृह मंत्री अमित शाह अपन नाकामीकेँ वायुसेनाक’ शौर्यक पाछू नहिं नुका सकैत छथि। हुनका पहलगाम हमलाक जिम्मेदारी स्वीकार करबाक चाहैत छल, जे पिछला बीस बरखमे भारतीय नागरिक पर भेल सबसँ भयानक हमला अछि।”