लुधियानामे ‘मिथिला धाम’क लेल गेल जमीन पर पहिल बेर झंडा फहराओल गेल। गणपति एन्क्लेवमे मिथिला धामक लेल गेल स्थानक पंजीकरणक बाद, सिग्मा नर्सिंग कॉलेज, नहर रोड, ब्रह्म मजरा लग झंडा फहरेलाक बाद मिठाई बांटल गेल।
एहि अवसर पर सभापति दीनानाथ झा आ अध्यक्ष विकास चौधरी कहलनि जे जाहि तरहें हम सभ एकजुट भऽ पंजीकरण करा लेलौंह, तहिना भवन निर्माणक काज जल्दिये शुरू भऽ जायत। शहरक सभ निवासीसँ आग्रह जे बेसीसँ बेसी सहयोग करी ताकि ई काज जल्दी पूरा भऽ सकय।
संस्थाक सचिव विवेकानंद झा कहलनि जे मिथिलाधामक निर्माण कार्य पूरा भेलाक बाद एतय विभिन्न प्रकारक जनोपयोगी आयोजन कयल जायत जाहिसँ सामाजिक कार्यमे रुचि विकसित होय।
मिथिलासँ बाहर एहि १२२५ वर्ग गज जमीन पर ‘मिथिला धाम’ भवन बनय केर श्रेय सभ देशवासीकेँ देबय चाहब।
संस्थाक सभापति दीनानाथ झा मीडियाकेँ संबोधित करैत कहलनि जे, जल्दिये हम भवननिर्माण शुरू करय जा रहल छी आ शिघ्र ई काज पूरा होयत। स्वतंत्रता दिवस पर समस्त देशवासीकेँ हार्दिक बधाई।
एहि अवसर पर संस्थापक नीलाम्बर झा, कोषाध्यक्ष गोविन्द झा, पूर्व चेयरमेन चन्द्रकान्त ठाकुर, पंकज झा, अनिल झा, विद्याचरण मिश्र, देवेन्द्र पण्डित, रजनीश झा, कैलाश चौधरी, रमेश झा, कृष्ण सहित अनेको जन उपस्थित छलथि।
