ऐतिहासिक चित्रकला शैली ‘पटना कलम’ केर प्रशिक्षण-सह-कार्यशालाक आयोजन

पटना समदिया || पटना कलम पेंटिंग्स शैलीक जीवंत भेलासँ बिहारक प्रसिद्धि संसार भरिक कला प्रेमी सब तक पहुँचत। जावत धरि नव पीढ़ीक कलाकार एहि शैलीमे सिद्धहस्त नहि भs जायत तावत धरि ई कला शैली वैश्विक स्तर पर पुनः प्रतिष्ठित नहि भs सकत। ई बात बुद्ध स्मृति पार्क संग्रहालय, इंटैक केर पटना चैप्टर एवं योर हेरिटेज केर संयुक्त तत्वावधानमे आयोजित पटना कलम प्रशिक्षण सह कार्यशालाक शुभारंभ करैत बी.डी. कॉलेजक प्रधानाचार्य प्रो. रत्ना अमृत कहलीह।

मुख्य अतिथिक रूपमे संबोधित करैत प्रो. रत्ना अमृत कहलन्हि जे बिहारक सांस्कृतिक विरासतकें संरक्षित करबाक वास्ते इंटैक केर प्रयास बहुत सराहनीय अछि। ओ ईहो कहलन्हि जे छठि पाबनिकेँ यूनेस्को केर अमूर्त सूचीमे शामिल करेबाक लेल इंटैकक संग बी.डी.कॉलेज सेहो मिलगकs प्रयास करत।

कार्यक्रमक अध्यक्षता करैत संग्रहालय, बिहारक पूर्व निदेशक डॉ.उमेश चंद्र द्विवेदी पटना कलम शैली केर उत्पत्ति, विकास एवं अवसान पर विस्तारसँ रौशनी देलन्हि। ओ कहलन्हि जे एहि चित्रकला शैलीक विशेषता समाजक आम जनजीवनक चित्रण अछि।

आगत अतिथि लोकनिक स्वागत करैत इंटैक, पटना चैप्टरक संयोजक भैरव लाल दास कहलन्हि जे पटना कलम शैली केर पुनः जीवंत करबाक लेल इंटैक द्वारा आयोजित ई छठम कार्यशाला अछि। ओ कहलन्हि जे बिहार सरकारक अधिकारीगणकें एखनि धरि ई स्पष्ट नहि भs पाओल अछि कि बिहार केर विरासत भवनक संरक्षण हेतु इंटैक टेंडर नहि भरि सकैत अछि, बल्कि इंटैक द्वारा ऑन रिक्वेस्ट काज कएल जाइत अछि। ओ कहलन्हि जे भारत सरकार एवं कतोक राज्य सरकार द्वारा इंटैकसँ काज करवाएल जाइत अछि, परन्तु बिहार सरकारक अधिकारी लोकनि एहि दिशामे उदासीन छथि।

बुद्ध स्मृति पार्क संग्रहालयक प्रभारी डॉ. शिव कुमार मिश्र कहलन्हि जे इंटैक द्वारा कैथी लिपि संरक्षणक क्षेत्रमे कएल गेल काजसँ सम्पूर्ण राज्य लाभान्वित भेल अछि। ओ ईहो कहलन्हि जे नेपाली मंदिर, हाजीपुर एवं अन्य विरासत भवन केर संरक्षणक काज आओर मिथिला शोध संस्थान, दरभंगामे रक्षित पांडुलिपि सभक संरक्षणक जिम्मेवारी इंटैककें देल जेबाक चाही।

धन्यवाद ज्ञापन करैत योर हेरिटेज केर रचना प्रियदर्शिनी कहलन्हि जे विरासतक संरक्षण कार्यकें नव पीढ़ीसँ जोड़िकेँ एहिमे रोजगारक अवसर सेहो उत्पन्न कएल जा सकैत अछि। एहि कार्यशालामे लगभग 40 कलाकार पटना कलम चित्रकला केर प्रशिक्षण लs रहल छथि जे शनिदिन 6 सितम्बरसँ 14 सितंबर धरि चलत। कार्यशालाक रिसोर्स पर्सन वरिष्ठ कलाकार प्रो.जीतेंद्र मोहन एवं प्रो. दिनेश कुमार छथि।

एहि अवसर पर हृदय नारायण झा, डॉ. नीतू तिवारी, डॉ.मनीष कुमार, रविशंकर उपाध्याय, वरिष्ठ फोटोग्राफर रूपक सिन्हा, भावना नथानी, कंचन दास, अमृता शाम्भवी, तृप्ति रानी, अंश राज सहित दर्जनों कलाकार एवं बुद्धिजीवी उपस्थित छलथि।