दरभंगा जिलाक दूटा अलग-अलग जगह पर हाई वोल्टेज करंटक संपर्कमे आबि दू गोट युवकक मृत्यु भs गेल। पहिल घटना औद्योगिक क्षेत्र धरमपुरक अछि, जतय एल्युमिनियम फैक्ट्रीमे काज करय वाला एकटा युवक केर करंट लगलासँ मृत्यु भs गेल, मृतकक पहिचान लहेरियासराय थाना क्षेत्रक गुदरी बाजार निवासी अरुण सिंहक रूपमे कयल गेल अछि।
अरुणक माय मंजू देवी कहलनि जे हुनकर बेटा सबदिन जकाँ फैक्ट्री चलि गेल। किछु समय बाद फैक्ट्रीसँ फोन आयल जे अरुणकेँ डीएमसीएचमे भर्ती कराओल गेल अछि। जाबैत परिवार अस्पताल पहुँचल ताबैत हुनकर मृत्यु भs गेल छल। मंजू देवी कानैत बजलीह जे ओकरा दू टा छोट-छोट बच्चा अछि, आब ओकर देखभाल के करत ? कानयकेँ कारण अरुणक पत्नी आ बच्चाक बुरा हाल अछि।
दोसर घटना सदर थाना क्षेत्रक दिल्ली मोड़क अछि, जतय श्रवण पंडित नामक युवक केर निर्माणाधीन मकानमे लोहाक छड़ पहुंचबैत काल करंट लगलासँ मृत्यु भs गेल। मृतक बहादुरपुर थाना क्षेत्रक अंकोपुर गामक निवासी छल। मृतकक भाई चंदन पंडित कहलनि जे, श्रवण किछु साथीक संग काज करय लेल गेल छल। छत पर लोहाक छड़ चढ़ैत काल हाई वोल्टेजक तारक संपर्कमे आबि गेल, जाहि कारणे हुनकर मौका पर मृत्यु भs गेलनि। एहि घटनामे एकटा आओर युवक झुलसि गेल, जेकर इलाज डीएमसीएचमे चलि रहल अछि।
