बिहार सरकार हालहिमे राज्यक विभिन्न भागमे पुल ढ़हबाक विभिन्न घटनाक जाँचक लेल एकटा उच्चस्तरीय समितिक गठन कयलक अछि। पछिला १३ दिनक भीतर बिहारमे पुल ढहबाक छओ घटना सामने आयल। ताजा घटना रविदिन किशनगंजक ठाकुरगंज प्रखंडक खौसी डाँगी गाममे भेल छल, जतय वर्ष २००९-१० मे एहि क्षेत्रक तत्कालीन लोकसभा सदस्यक एमपी फंडसँ बनल एकटा छोट पुल ढ़हि गेल छल। बिहारमे हालक समयमे ढ़हि गेल अधिकांश पुल (निर्माणाधीन सहित) राज्य सरकारक ग्रामीण निर्माण विभाग (आरडब्ल्यूडी) द्वारा बनाओल अथवा बनबाओल गेल छल।
बिहार ग्रामीण निर्माण विभागक मंत्री अशोक चौधरी कहलनि, “बिहारक अलग-अलग हिस्सामे पुल ढ़हलाक घटनाक जांचक लेल मुख्य अभियंताक अध्यक्षतामे एकटा उच्चस्तरीय समिति गठित कयल गेल अछि। समिति पुल ढ़हबाक कारणक पता लगाओत आ आवश्यकतानुसार उपाय करबाक सुझाव देत। समिति विशेषतः आरडब्ल्यूडी द्वारा बनाओल जा रहल या बनाओल जा चुकल पुलसँ जुड़ल घटनाक जाँच करत, आ दू-तीन दिनक भीतर रिपोर्ट देबाक लेल कहल गेल अछि।
चौधरी कहलनि जे प्रारंभिक रिपोर्टसँ पता चलैत अछि जे किछु पुल चालू नहिं छल आ किछु पुलक मरम्मतक आवश्यकता छल। “उदाहरणक लेल, १८ जूनकेँ बिहारक अररिया जिलाक परारिया गाममे बकरा नदी पर नवनिर्मित १८२ मीटर नमगर पुलक एकटा हिस्सा खसि पड़ल। एहि पुलक निर्माण आरडब्ल्यूडी द्वारा प्रधानमंत्री ग्राम सड़क योजनाक अन्तर्गत कयल गेल छल, मुदा किछु निर्माण लम्बित रहबाक कारणेँ एकरा जनताक लेल नहिं खोलल गेल छल।” मंत्री कहलनि, “मुदा पुल ढ़हनाइ एकटा गंभीर मामिला अछि आ जे कियो दोषी पाओल जायत ओकरा पर कार्रवाई कयल जायत।”
मंत्री अशोक चौधरी कहलनि जे समितिकेँ निर्देश देल गेल अछि जे ओ पुलक नींव आ संरचनाक निर्माणमे प्रयुक्त सामग्रीक गुणवत्ता सहित प्रत्येक विवरणक जाँच करय। पछिला सप्ताह बिहारक मधुबनी, अररिया, सीवान आ पूर्वी चम्पारण जिलामे पुल ढहबाक घटना सामने आयल छल। किशनगंज जिलामे पिछला छः दिनमे दू टा पुल ढ़हि गेल अछि।
