दिल्ली उच्च न्यायालय शराब घोटाला मामिलामे तिहाड़ जेलमे बंद दिल्लीक मुख्यमंत्री अरविंद केजरीवालक जमानत याचिका पर शुक्रवारकेँ केंद्रीय अन्वेषण ब्यूरो (सीबीआई) केर नोटिस जारी कऽ जवाब मांगलक। एहि मामिलाक अगिला सुनवाई १७ जुलाईकेँ होयत।
दिल्ली उच्च न्यायालय शुक्रदिन सीबीआईकेँ नोटिस जारी कऽ शराब घोटालासँ जुड़ल मनी लॉन्ड्रिंग मामिलामे दिल्लीक मुख्यमंत्री अरविंद केजरीवालक जमानत याचिका पर जवाब मांगलक। उच्च न्यायालय एहि मामिलाक अगिला सुनवाई १७ जुलाईक लेल सूचीबद्ध कयलक। ओहिसँ पहिने सीबीआईकेँ जवाब दाखिल करय पड़त। केजरीवाल एखनि दिल्लीक तिहाड़ जेलमे बंद छथि।
न्यायमूर्ति नीना बंसल कृष्णाक पीठ केजरीवालक जमानत याचिकापर सुनवाई कयलक आ सुनवाईक अगिला तारीख ओही दिन तय कयलक जाहि दिन हुनकर गिरफ्तारीकेँ चुनौती देबयवला याचिका छल। सुनवाई केर दौरान उच्च न्यायालय केजरीवालक वकीलसँ पूछलक जे जखन अहां लग विकल्प छल तखन अहाँ उच्च न्यायालयमे किएक गेलहुं ? अहां निचली अदालतमे जमानत याचिका किएक नहिं दाखिल कयलहुँ ? सर्वोच्च न्यायालय आ उच्च न्यायालयमे लगातार याचिका दायर करबाक संबंधमे न्यायालय केजरीवालक ओकीलसभसँ कहलक जे जखन वैकल्पिक उपाय उपलब्ध अछि तखन उच्च न्यायपालिकामे बाधा नहिं उत्पन्न करथि। कोनो तऽ कारण हेबाक चाही कि एहन करब किएक बेहतर अछि ? उच्च न्यायालय ई टिप्पणी तखन कयलक जखन केजरीवालक तरफसँ वरिष्ठ अधिवक्ता अभिषेक मनु सिंघवी, एन हरिहरन आ विक्रम चौधरी उपस्थित भेलाह।
सीबीआई केर तरफसँ वरिष्ठ अधिवक्ता डीपी सिंह उपस्थित भेलाह। सिंह पीठकेँ कहलनि जे जमानत आवेदन निचली अदालतमे दाखिल कयल जयबाक चाही किएक तँ ओ विकल्प उपलब्ध छल। एकर बादो एकरा उच्च न्यायालयमे दायर कयल गेल, जखन कि गिरफ्तारीकेँ एतय पहिनेसँ चुनौती देल जा चुकल अछि। जबाबमे सिंघवी कहलनि जे ईडी मामिलामे निचली अदालतसँ जमानत भेटलाक बाद केजरीवालकेँ सीबीआई गिरफ्तार कयलक।
सिंघवी कहलनि कि केजरीवाल नहिं तऽ भगोड़ा छथि आ ने आतंकवादी। गिरफ्तारीसँ पहिने ट्रिपल टेस्ट (भागबाक खतरा, गवाह सभकेँ प्रभावित करब आ साक्ष्य नष्ट करब) देखल जाइत अछि।
विक्रम चौधरी कहलनि जे चूँकि निचली अदालत केजरीवालकेँ रिमांड पर भेज देलक आ कहलक जे सीआरपीसीक धारा ४१ए क उल्लंघन नहिं कयल गेल अछि, तेँ निचली अदालतमे जमानत याचिका दायर करब व्यर्थ होइत।
वकीलक दलीलपर विचार कयलाक बाद पीठ केजरीवालक जमानत याचिका पर सीबीआईकेँ नोटिस जारी कयलक आ हुनकर गिरफ्तारीकेँ चुनौती देबयवला याचिकापर अगिला सुनवाईक तारीख १७ जुलाई तय कयलक।
