इजरायल रक्षा बल (आईडीएफ) शनिदिन दावा कयलक जे हिजबुल्लाहक प्रमुख हसन नसरल्लाह ओकर हमलामे मारल गेल अछि। आईडीएफक अनुसार, शुक्रदिन देर राति बेरूतक दक्षिणी उपनगरमे लेबनानी उग्रवादी समूहक मुख्यालयपर भेल हमलामे नसरल्लाह मारल गेल अछि।
आईडीएफ इहो दावा कयलक जे नसरल्लाहक सङ्ग आतंकवादी संगठनक कतेको आन कमांडर सेहो मारल गेल अछि। ओहिमे हिजबुल्लाहक दक्षिणी मोर्चाक सेनापति अली कार्की सेहो अछि।
लेबनानी उग्रवादी समूहक मुख्यालय बेरूतक दक्षिणी उपनगर दहिहमे एकटा आवासीय भवनक नीचा स्थित छल। आईडीएफ कहलक, “आईडीएफ पुष्टि करैत अछि जे हिजबुल्लाह आतंकवादी संगठनक नेता आ ओकर संस्थापकमे सँ एक हसन नसरल्लाह शुक्रकेँ मारल गेल अछि, संगहि हिजबुल्लाहक दक्षिणी मोर्चाक कमांडर अली कार्की आ अन्य हिजबुल्लाह कमांडर सेहो मारल गेल अछि।”
नसरल्लाहक खात्माक बाद आईडीएफक चीफ ऑफ स्टाफ लेफ्टिनेंट जनरल हर्जी हलेवी कहलनि, “संदेश स्पष्ट अछि, हम प्रत्येक ओहि सदस्य तक पहुँचब जनैत छी जे इजरायल राज्यक नागरिकक लेल खतरा अछि।”
इजरायली मीडिया रिपोर्टमे इहो दावा कयल गेल अछि जे दक्षिणी बेरूतमे हिजबुल्लाहक गढ़केँ निशाना बनबैत हवाई हमलामे नसरल्लाहक बेटी जैनब सेहो मारल गेल अछि, यद्यपि हिजबुल्लाह वा लेबनानी मीडियासँ कोनो पुष्टि नहिं भेल अछि।
इजरायल बेरूतक दक्षिणी उपनगर दहिहमे हिजबुल्लाहक मुख्यालयकेँ निशाना बनयबाक बाद शनिकेँ भोरे अपन आक्रमण फेरसँ शुरू कयलक। इजरायली सेनाक कहब अछि जे हमलाक लक्ष्य नागरिक भवनक नीचा राखल हथियारक हिजबुल्लाहक जखीरा छल।
बेरूतमे प्रत्यक्षदर्शीलोकनि कहलनि जे इजरायली युद्धक विमान शहरक दक्षिणी उपनगरक उपर उड़ि रहल छल आ एक घंटाक अन्तरालमे कतेको बेर एकटा आवासीय क्षेत्रपर बमबारी कऽ रहल छल।
हमलासँ पहिने इजरायली सैन्य प्रवक्ता डैनियल हगारी कहलनि “हिजबुल्लाह द्वारा लक्षित हथियारमे ईरानी मिसाइल सेहो शामिल छल।”
