देशमे लोकसभा चुनावक लेल ४ चरणक मतदान भऽ चुकल अछि। चुनावक ३ चरण बाँचल अछि। देश भरिमे ३८० सीटपर चुनाव भेल अछि। एम्हर राजनीतिक चाणक्य मानल जायवला प्रशांत किशोर भाजपाक विषयमे पैघ भविष्यवाणी कयलनि अछि। प्रशांत किशोर लोकसभा चुनावमे ओडिशा, पश्चिम बंगाल आ आंध्र प्रदेशक बारेमे बड़का भविष्यवाणी कयलनि अछि। संगहि ओ उत्तर आ पश्चिम भारत राज्यमे चुनाव परिणामक भविष्यवाणी सेहो कयलनि अछि।
राजनीतिक रणनीतिकार प्रशांत किशोर कहलनि अछि जे तेलंगाना, ओडिशा, पश्चिम बंगाल आ आंध्र प्रदेशमे भाजपाक सीट बढ़ि रहल अछि। ओ कहलनि जे भाजपा पूर्व आ दक्षिणमे काफी लाभ कमा रहल अछि, जतय ओ पारम्परिक रूपसँ कमजोर रहल अछि। दक्षिण भारत आ पूर्वी भारतमे वोट शेयर आ सीटक हिस्सेदारी दुनू बढ़ि रहल अछि। तमिलनाडुमे सेहो भाजपाक वोट शेयर बढ़त। ओ कहलनि हम उत्तर आ पश्चिम भारतमे भाजपाकेँ बेसी सीट हारैत नहिं देखि रहल छी, जे पहिनेसँ भाजपाक गढ़ रहल अछि।
प्रशांत किशोर कहलनि कि, जे कहि रहल छथि जे भाजपा एहि बेर २०० सीट सेहो नहिं जीत पाओत, हुनका बतौबाक चाही जे वर्तमान ३०० सीटमे सँ भाजपा १०० सीट कतऽ हारि रहल अछि ? भाजपाक वोट शेयर आ सीट दक्षिण आ पूरबमे बढ़त। भाजपाक सीटमे कोनो पैघ बदलाव नहिं अछि।
पछिला मास सेहो लोकसभा चुनावक प्रारम्भमे पीके बंगालमे भाजपाक जीतक दावा कयने छलाह। ओ कहने छलाह जे भाजपा पश्चिम बंगालमे नंबर १ पार्टी बनि सकैत अछि। पुनः प्रशांत किशोर कहलनि जे भाजपा पछिला किछु सालमे दक्षिण आ पूर्वी भारतमे अपन उपस्थिति बढ़ेबाक लेल कठिन परिश्रम कयलक अछि। एहि बेर पार्टीकेँ एकर लाभ भेटि सकैत अछि। प्रशांत किशोर कहने छलाह जे हुनका लगैत अछि जे भाजपा बंगालमे नंबर एक पार्टीक रूपमे उभरत।
ओना, पीके किछु दिन पहिने कहने छलाह जे भाजपाक अपन लक्ष्यक अनुसार ३७० सीट जीतबाक संभावना नहि अछि, मुदा ओहि दौरान ओ तेलंगाना आ आंध्र प्रदेशमे भाजपाक सफलताक दावा सेहो कयलनि, जाहि दौरान ओ कहने छलाह जे मुख्यमंत्री जगन मोहन रेड्डीक लेल सत्तामे वापसी बहुत कठिन होयत।
प्रशांत किशोर बंगाल आ ओडिशामे भाजपाक जीतक दावा कयने छथि। ओ इहो कहलनि अछि जे जाहि राज्यमे भाजपा पहिनेसँ नीक स्थितिमे अछि, ओहि राज्यमे सीटमे कोनो कमीक बेसी आशा नहिं अछि। बिहार, झारखंड, बंगाल आ ओडिशामे लोकसभाक ११७ सीट अछि। पछिला लोकसभा चुनावमे एनडीए ७७ सीट जीतल छल। बिहारक ४० सीटमेसँ एनडीए ३९ सीट जितलक। झारखण्डक १४ सीटमेसँ एनडीए १२ सीट जितलक। भाजपा बंगालक ४२ सीटमेसँ १८ सीट जितलक। ओडिशाक २१ सीटमेसँ भाजपा ८ टा सीट जितलक। एहि ४ राज्यमे एखनो ४० सीट अछि जतय भाजपा पछिला चुनावमे नहिं जीतल छल। एनडीएक मिशन ४०० सँ भाजपा एहि क्षेत्रमे विस्तार करय चाहैत अछि। प्रशांत किशोर भाजपाक सफलताक भविष्यवाणी कऽ रहल छथि, विशेष रूपसँ बंगाल आ ओडिशामे।
भारतीय जनता पार्टी आ एनडीए बंगालक ४२ सीटमेसँ १८ सीट जीतबाक लक्ष्य रखलक अछि। ओडिशामे सेहो भाजपाक मिशन १५ सीट अछि। एहन स्थितिमे भाजपा ओडिशासँ सेहो ७ सीटक वृद्धिक अपेक्षा कऽ रहल अछि। तेलंगानामे सेहो भाजपा २ अंकमे सीट तक पहुँचय चाहैत अछि। आंध्र प्रदेशमे एनडीए एहि बेर २५ सीटपर पैघ जीत हासिल करबाक आशा अछि।
पीएम मोदी कहने छलथि, तेलंगाना आ आन्ध्र प्रदेश सन राज्यमे हमरासभकेँ एहन सफलता भेटत जकर लोक कल्पना नहिं कयने होयत। संगहि, प्रशांत किशोर तमिलनाडुमे सेहो भाजपाक वोट शेयरक बढ़ोत्तरीक दावा कयलनि अछि।
