रांची स्थित पीएमएलए अदालत ईडीक आवेदन पर झारखंडक पूर्व मुख्यमंत्री हेमंत सोरेनकेँ पांच दिनक रिमांड पर लेबय केर मंजूरी देलक अछि। रिमांड अवधि शुक्रसँ शुरू होएत।
जमीन घोटालाक अलावा ईडी हुनका दिल्लीक आवाससँ ३६ लाख टका आ दूटा बीएमडब्ल्यू कार बरामदगीक बारेमे सेहो पूछताछ करत।
आठ घंटाक पूछताछक बाद सोरेनकेँ ३१ जनवरीकेँ गिरफ्तार कयल गेल छल। एकर बाद ईडी हुनका १ फरवरीकेँ अदालतमे पेश कयलक आ १० दिनक रिमांड पर लेबाक अनुरोध कयलक।
दुनू पक्षक दलीलक बाद अदालत फैसला सुरक्षित राखि लेलक।
ईडीक ओकीलसभ कहलनि जे रांची भूमि घोटालामे आगू जाँचक लेल सोरेनसँ कतेको बिन्दु पर पूछताछ करबाक आवश्यकता अछि।
दोसर दिस हेमंत सोरेनक वकील ईडीक रिमांडक मांगक विरोध कयलनि आ पूरा कार्रवाई केर दुर्भावनापूर्ण बतौलनि।
अदालत दुनू पक्षकेँ सुनलाक बाद रिमांडक प्रश्न पर फैसला सुरक्षित रखलक आ ताबैत धरिक लेल हुनका न्यायिक हिरासतमे भेजय केर आदेश देने छल। एकर बाद हुनका रांचीक होटवार स्थित बिरसा मुंडा सेंट्रल जेल भेजल गेल छल।
