उत्तर प्रदेशक हाथरस जिलामे शनिदिन भगदड़मे कमसँ कम १२१ लोकक मृत्यु भऽ गेल, जखन श्रद्धालु भगवान शिवक ‘सत्संग’मे भाग लेबाक लेल जमा भेलाह। एहि मामिलामे सीएम योगी आब हरकतमे आबि गेल छथि। मुख्यमंत्री पूरा घटनाक न्यायिक जाञ्चक आदेश देलनि अछि।
हाथरस त्रासदी पर उत्तर प्रदेशक मुख्यमंत्री योगी आदित्यनाथ कहलनि जे एहि कार्यक्रममे अपन उपदेश देबय लेल आयल सज्जनक कथा समाप्त भेलाक बाद मंचसँ उतरलाक बाद महिलाक एकटा समूह हुनका छूबय लेल आगू आयल, तखने तकर पाछू एकटा भीड़ बढ़ल। एहि दौरान ओ सभ एक दोसरक ऊपर चढ़ि गेलाह। सेवादार सेहो लोकसभकेँ धक्का दैत रहलाह जाहि कारणेँ ई दुर्घटना भेल। एहि पूरा प्रकरणक लेल एडीजी आगराक अध्यक्षतामे एकटा एसआईटीक गठन कयल गेल अछि जे प्रारम्भिक रिपोर्ट प्रस्तुत कयलक अछि। बहुत रास पहलू अछि जकर जाँच करबाक आवश्यकता अछि।
हाथरसक भगदड़ पर उत्तर प्रदेशक मुख्यमंत्री योगी आदित्यनाथ कहलनि, “किछु लोकक एहन दुखद घटना पर राजनीति करबाक प्रवृत्ति रहैत अछि। एहेन लोकक आदत, चोरी आ सीनाजोरी दुनू रहैत अछि। सभगोटे जनैत छथि जे ओहि सज्जनक फोटो केकरा सङ्ग अछि आ हुनक राजनीतिक सम्बन्ध केकरा सङ्ग जुड़ल अछि। अहाँसभ जरूर देखने होयब जे पहिने रैलीक दौरान एहन भगदड़ कतऽ होइत छल आ एकर पाछाँ केकर हाथ रहैत छल।
एम्हर पुलिस आयोजकक खिलाफ एफआईआर दर्ज कयलक अछि। उत्तर प्रदेशक मुख्यमंत्री आदित्यनाथ योगी स्वयं एहि मामिलाक निगरानी कऽ रहल छथि। एफ.आई.आर.मे बाबाक नाम उल्लेख नहिं अछि। बाबा कतए छथि, एहि बारेमे दूटा बात सामने आबि रहल अछि। पहिल ई जे पुलिस हुनका एकटा आश्रममे रखलक अछि, कहल जा रहल अछि जे मामिला शांत भेला पर पुलिस हुनकर गिरफ्तारीक जानकारी दऽ सकैत अछि। दोसर बाबाक फरार आ मोबाइल बंद होयबाक सूचना सेहो सोझाँ आयल अछि। आगाँ जे होइ, पूरा देश एहि घटनासँ स्तब्ध अछि।
