देश-दुनिया

हमरा लग समुद्रमे अमेरिकासॅं बेसी परमाणु पनडुब्बी अछि : रूसी सांसद

नई दिल्ली
*

रूसक एकटा वरिष्ठ सांसद दावा कयलनि कि रूस‌ लग एखनि अमेरिकाक तुलनामे दुनिया केर महासागरमे बेसी परमाणु पनडुब्बी तैनात अछि। ई बयान अमेरिकी राष्ट्रपति डोनाल्ड ट्रंपक ओहि टिप्पणीक जवाबमे देल गेल अछि, जाहिमे ओ दूटा परमाणु पनडुब्बीकें ‘उपयुक्त क्षेत्र’मे भेजय केर बात कयलनि।

ट्रंपक ई बयान रूसक पूर्व राष्ट्रपति दिमित्री मेदवेदेव केर हालक टिप्पणीक बाद देल गेल अछि। स्टेट ड्यूमा केर सीआईएस अफेयर्स, यूरेशियन इंटीग्रेशन आ डायस्पोरा रिलेशंस कमेटी केर फर्स्ट डिप्टी चेयरमैन विक्टर वोडोलात्स्की कहलनि कि ट्रंप जकरा ‘उपयुक्त क्षेत्र’ मे भेजय केर आदेश देने छल, ओहि पर पहिनेसॅं हमर नियंत्रण अछि। अमेरिकी राष्ट्रपति केर एही बात पर मास्कोक प्रतिक्रिया देबाक कोनो जरूरत नहिं अछि। “हमरा सब लग दुनियाक महासागरमे बहुत सारा (परमाणु) पनडुब्बी अछि, सबसॅं मजबूत, सबसॅं शक्तिशाली हथियार अछि। तॅं भले ही (ट्रम्प केर) दूटा पनडुब्बी इम्हर उम्हर घूमी रहल अछि, मुदा ओ बहुत दिनसॅं हमर निगरानीमे अछि। हमरा दिसिसॅं कोनो प्रतिक्रिया नहिं देबाक आवश्यकता, हम बहुत नीकसॅं समझैत छी कि डोनाल्ड ट्रंप की अछि। पिछला किछू महीनामे ई साफ भऽ गेल अछि कि ओ हर २४ घंटा पर अपन विचार बदलैत छथि।”

ट्रंप शुक्रदिन अपन सोशल मीडिया प्लेटफॉर्म पर मेदवेदेव केर “अत्यंत भड़काऊ बयान” केर जवाबमे एहेन कदमक घोषणा कयलनि। रूस केर पूर्व राष्ट्रपति आ वर्तमानमे रूसी संघक सुरक्षा परिषदक उपाध्यक्ष दिमित्री मेदवेदेव केर बयानक बाद अमेरिकी राष्ट्रपति डोनाल्ड ट्रंप सोशल मीडिया प्लेटफॉर्म ‘ट्रूथ’ पर लिखलनि, “रूस केर पूर्व राष्ट्रपति दिमित्री मेदवेदेव केर बेहद भड़काऊ बयानक आलोकमे हम ई चेतावनीक तौर पर दूटा परमाणु पनडुब्बीकें ‘उचित क्षेत्र’मे तैनात करय केर आदेश देने छियै, जॅं एहेन हालतमे मूर्खतापूर्ण आ भड़काऊ बयानक शब्द निकलैत अछि तॅं कखनो काल एकर अनचाहा परिणाम सेहो भऽ सकैत अछि। हालांकि ट्रंप एहि बातकें स्पष्ट नै कयलनि कि कोन पनडुब्बी भेजल गेल अछि आ ओकरा कतय तैनात कयल गेल अछि।

Spread the love