इजरायलक प्रधानमन्त्री बेंजामिन नेतन्याहू रविदिन स्पष्ट कयलनि जे गाजामे युद्धविराम ताबत धरि प्रभावी नहि होयत जाबत धरि हमास द्वारा छोड़ल जायवला बंधकसभक सूची से नहि भेटि जायत। एहिसँ ई प्रश्न उठैत अछि जे की इजरायल आ हमसक बीच युद्धविराम समझौता अटकत ?
इजरायलक प्रधानमन्त्री बेंजामिन नेतन्याहू रविदिन कहलनि जे गाजामे युद्धविराम ताबत धरि प्रभावी नहि होयत जाबत धरि हमास कतेको फिलिस्तीनी कैदीक बदलामे छोड़ल जायवला तीनटा बंधकक सूची नहि दैत अछि। नेतन्याहू एकटा बयानमे कहलनि जे ओ सेनाकेँ निर्देश देलनि अछि जे युद्धविराम, जे स्थानीय समयानुसार भोर ८:३० बजे प्रभावी होबयवाला छल, “ताबत धरि प्रभावी नहि होयत जाबत धरि इजरायलकेँ ओहि बंधकसभक सूची नहि भेटत जकरा हमास प्रदान करबाक वचन देलक।” ओ एक राति पहिने एहने चेतावनी जारी कयने छलाह।
इजरायली सेना कहलक जे ओ गाजा पट्टी पर “अपन हमला जारी राखि रहल अछि” कियैक तँ हमासक सङ्ग विवादक कारण युद्धविराममे देरी भऽ रहल अछि। सेनाक मुख्य प्रवक्ता रियर एडमिरल डैनियल हंगरी कहलनि जे युद्धविराम ताबति धरि प्रभावी नहि होयत जाबत धरि हमास रविदिन छोड़ल जायवला तीनटा बंधकक नाम नहि दैत अछि।
हमास नाम देबामे देरीक “तकनीकी कारण”क हवाला देलक। ई एकटा वक्तव्यमे कहलक जे ओ पछिला सप्ताह घोषित युद्धविराम समझौताक प्रति प्रतिबद्ध अछि।
एम्हर इजरायल सूचना जारी कयलक अछि जे २०१४क इजरायल-हमास युद्धमे मारल गेल सैनिक ओरोन शौलक शव एकटा विशेष अभियानमे बरामद कयल गेल अछि। शौल आ एकटा आओर सैनिक हदर गोल्डिनक शव २०१४क युद्धक बाद गाजामे छल आ मृतक सैनिकक परिवारक अनुरोधक बादो हुनका वापिस नहि कयल गेल छल। ई विशेष अभियान युद्धविराम प्रभावी होयबासँ किछु घंटा पहिने कयल गेल।
