बिहारक राजधानी पटनाक पॉश इलाकाक पोलो रोडमे फायरिंगक घटनाकेँ लऽ कऽ राष्ट्रीय जनता दल (राजद) केर नेता आ पूर्व उपमुख्यमंत्री तेजस्वी यादवक पहिल प्रतिक्रिया सामने आएल अछि। ओ एहि घटनाकेँ लऽ कऽ राज्यक नीतीश कुमार सरकार पर निशाना साधलनि आ कतेको गंभीर आरोप लगेलनि।
राजद नेता तेजस्वी यादव कहलनि जे आइ हमर आवासक बाहर गोली चलल वा चलवाओल गेल अछि ? एनडीए केर राजमे सत्ता संरक्षित अपराधीक मनोबल एतेक बढ़ल अछि जे अपराधी हाई सिक्योरिटी जोनमे खुल्लमखुल्ला फायरिंग करैत घूमि रहल छथि।
बिहार विधानसभामे नेता प्रतिपक्ष तेजस्वी यादव सोशल मीडिया प्लेटफॉर्म एक्स पर लिखलथि, ”आइ हमर आवासक बाहर गोली चलल/चलवाओल गेल अछि। एनडीए केर राक्षस राजमे सत्ता संरक्षित अपराधीक मनोबल एतेक बढ़ल अछि जे अपराधी हाई सिक्योरिटी जोनमे किछुए दूरी पर जतय राज्यपाल आवास राजभवन, मुख्यमंत्री आवास, नेता प्रतिपक्ष आवास, न्यायाधीश आवास आ एयरपोर्ट अछि, ओहि ठाम खूंखार अपराधी खुल्लमखुल्ला फायरिंग करैत घूमि रहल अछि। खबरदार! कियो एकरा जंगलराज कहब तऽ ? ओहुना काल्हि (शुक्र) प्रधानमंत्री बिहार आबि रहल अछि तऽ गोदी मीडियाकेँ सकारात्मक छवि बना कऽ राखय पड़त।”
पटनाक पॉश इलाका पोलो रोडमे विधानसभाक विपक्षक नेता तेजस्वी यादव सहित कतेको वरिष्ठ मंत्री सभक घर अछि। कहल जा रहल अछि जे अपराधी राहुल कुमारक हत्याक नीयतसँ आएल छल, जखनि हुनकर निशाना चूकि गेल त’ ओ भागि गेल। यद्यपि एहिमे ककरो हताहत होयबाक सूचना नहि अछि। घटनाक सूचना भेटैत पुलिस स्थान पर पहुंचल आ मामिलाक तफ्तीशमे जुटि गेल। पुलिसक कहब अछि जे इलाकामे लागल सीसीटीवी फुटेजक जाँच क’ रहल अछि, जाहिसँ हमलावर सभक पहिचान करबामे मददि भेटत। कहल जा रहल अछि जे दू टा अपराधी एकटा बाइक पर सवार भ’ क’ आएल छल आ घटनाक अंजाम दऽ कऽ भागि गेल। पुलिसक दावा अछि जे जल्दीए अपराधी गिरफ्तार भ’ जाएत। एहि घटनाकेँ गंभीरतासँ लेैत इलाकेमे सुरक्षा सेहो बढ़ा देल गेल अछि। पुलिस आस-पासक लोकसभसँ पूछताछ क’ रहल छल जाहिसँ आर जानकारी भेटि सकय।
