नेपालक प्रधानमंत्री केपी ओली पूर्व राजा ज्ञानेन्द्र शाह पर देशमे अशांति पसारय आ सामाजिक सद्भाव बिगाड़य केर आरोप लगौलनि अछि। प्रधानमंत्री ओली सोमदिन कहलनि जे पूर्व राजा ज्ञानेन्द्र शाह देशमे सामाजिक सद्भावकेँ बिगाड़य आ समाजमे बिभाजन पैदा करयकेँ प्रयास करैत छथि। जाहिकेँ परिणाम स्वरूप राजतंत्र समर्थक प्रदर्शनमे हिंसा भड़कि गेल।
प्रतिनिधि सभामे बाजैत समय प्रधानमंत्री ओली आरोप लगौलनि जे पूर्व राजा शाह अपन महत्वाकांक्षाक लेल सामाजिक अशांति पसारयकेँ प्रयास कयलनि, जकरा चलते तिनकुने क्षेत्रमे हिंसक घटना घटित भेल।
हिंसक प्रदर्शनसभमे सुरक्षाकर्मी आ प्रदर्शनकारी सभक बीच झड़पमे एक टीवी कैमरामैन सहित दू लोकक मृत्यु भेल आ 110 घायल भेल। प्रदर्शनकारी सभक मांग छल जे नेपालमे हिंदू राजतंत्र फेरसँ स्थापित कायल जाय। हिंसक विरोध प्रदर्शनक सिलसिलामे एखनि धरि 110 लोक गिरफ्तार कएल गेल अछि। प्रधानमंत्री कहलनि जे एही हिंसक गतिविधि सभकेँ राजनीतिक गतिविधि नहि मानल जा सकैत अछि आ हिंसामे संलग्न लोककेँ छोड़ल नहि जाएत।
प्रधानमन्त्री ओली कहलनि जे गृह मन्त्रालय जल्दीए एहि घटना केर विस्तृत जानकारी संसदकेँ देत आ सम्पूर्ण मामिला पर एकटा विस्तृत रिपोर्ट तैयार कएल जायत।
