अमृतसर मंदिर पर ग्रेनेड हमलाक मामिलामे फरार आतंकी गिरफ्तार

गयाजी समदिया || एनआईए केर टीम एकटा खालिस्तानी आतंकीकेँ गिरफ्तार कयलक अछि। ई गिरफ्तारी बिहारक गयाजीसँ भेल अछि। अमृतसर मंदिर पर ग्रेनेड हमलाक मामिलामे ई आतंकी फरार छल।

एनआईए केर टीम बिहारक गयाजीसँ एकटा खालिस्तानी आतंकी शरणजीत कुमार उर्फ ​​सनीकेँ गिरफ्तार कयलक अछि। ई आतंकी बहुत दिनसँ फरार छल आ ओ बहुत दिन तक भेष बदलि कए गयाजीक शेरघाटीमे नुकायल छल ।
एनआईए केर टीमक भेटल जानकारीक बाद शुक्रदिन देर राति शेरघाटीक गोपालपुरसँ एहि आतंकीकेँ छापामारी कय गिरफ्तार कय लेल गेल अछि। एनआईए टीम आ स्थानीय थाना शेरघाटी पुलिस गोपालपुर गामक समीप राष्ट्रीय राजमार्ग पर छापा मारि कय गिरफ्तार कय लेलक।

एनआईए एकटा प्रेस विज्ञप्ति जारी कय कहलक अछि कि मार्च २०२५ मे अमृतसर मंदिरमे ग्रेनेड हमलाक मामिलामे मुख्य आतंकी आरोपी शरणजीत कुमार उर्फ ​​सनीकेँ गिरफ्तार कय लेल गेल अछि। पंजाबक गुरदासपुर जिलाक बटालाक कंदिया जिलाक भैनी बंगर गामक निवासी अछि।

15 मार्च 2025 केँ आतंकी हमलाक षड्यंत्र आ निष्पादनमे शरणजीतकेँ सक्रिय भूमिका छल। 2 बाइक सवार हमलावर ग्रेनेड हमला कयलक, जाहिमे गुरुसिदक आ विशाल गिल शामिल छल। एनआईए केर जांचमे यूरोप, अमेरिका आ कनाडामे अंतरराष्ट्रीय स्तर पर मौजूद हैंडलरक साजिशक खुलासा कयल गेल अछि।

गिरफ्तार आतंकी शरणजीत कुमारकेँ 1 मार्च 2025 केँ गुरदासपुरक बटालामे ग्रेनेड केर खेप भेटल छल। हमलासँ महज दू दिन पहिने ग्रेनेड गुरसीदक आ विशालकेँ सौंपल गेल छल।

अपन भेष बदलि कय कखनो ट्रक चालक तँ कखनो आन पहिचान बना कय अपन गतिविधि संचालित करैत छल। जीटी रोड पर लाइन होटलमे अपन नुकाबय जगह बना लेने छल आ ओतहिसँ सक्रिय छल। गिरफ्तारीकेँ बाद एनआईए केर टीम आतंकीक संग चंडीगढ़क लेल रवाना भऽ गेल।

ध्यान देबय वला बात अछि कि किछु समयसँ खालिस्तानी आतंकी बहुत सक्रिय मोडमे देखल जा रहल अछि। एहनमे सरकारक संग संग जनताकेँ सेहो सतर्क रहय केर जरूरत अछि। जँ अहांकेँ कोनो संदिग्ध गतिविधि देखय लेल भेटय तँ तुरंत पुलिसकेँ सूचित करी।