पटनामे नीतीश कुमारक खिलाफ महागठबंधनक एहि प्रदर्शनमे आरजेडी, कांग्रेस आ वामदलक नेता एवं कार्यकर्ता शामिल छल। प्रदर्शन क’ रहल लोक मुख्यमंत्रीक इस्तीफाक मांग क’ रहल छलथि। बिहारक सीएम नीतीश कुमारक राष्ट्रगान अपमानक मुद्दा आब तूल पकड़ि चुकल अछि।
महागठबंधनक नेता आ कार्यकर्ता एहि कारणे पटनाक सड़क पर उतरि गेल छथि आ हुनक इस्तीफाक मांग क’ रहल छथि। महागठबंधनक कार्यकर्ता नीतीश कुमारक पुतला सेहो दहन कएलक अछि। हाथमे बैनर पोस्टर सेहो ल’ क’ चलि रहल छलथि, जाहि पर लिखल छल – ‘नीतीश कुमार इस्तीफा दो’, ‘अचेतावस्था में आप चले गए हैं’, ‘राष्ट्रगानक अपमान नहीं सहेगा हिंदुस्तान।’
पटनामे महागठबंधनक एहि प्रदर्शनमे आरजेडी, कांग्रेस आ वामदलक नेता आ कार्यकर्ता शामिल छलथि। आरजेडी प्रवक्ता एजाज अहमद कहलनि, “नीतीश कुमार टोटली अनफिट छथि। सीएमक कुर्सी तुरंत छोड़ि देल जाओ। अपन हरकतसँ बिहार सहित पूरा देशकेँ लज्जित करैत छी।
राष्ट्रगानक अपमान कयलनि। हंसि रहल छलथि। प्रणाम कऽ रहल छलथि। महात्मा गांधीक पुण्यतिथि पर आयोजित श्रद्धांजलि सभामे नीतीश ताली बजाबऽ लगलथि। महिलाकें लऽ कऽ अमर्यादित टिप्पणी करैत छथि। एक्को मिनट लेल हुनका मुख्यमंत्री रहबाक हक नहि अछि।
ओतहि तेजस्वीक टीका-टोपी विवाद पर ओ कहलथि जे तेजस्वी गंगा जमुनी तहजीबक मिसाल पेश कयलनि अछि। मंदिरमे छलथि त’ टीका लगेने छलथि। इफ्तारमे गेलाह त’ टोपी लगौलनि। सभ धर्मक संग ल’ क’ चलैत छथि। बीजेपी आ जदयू समाज केर बाँटि रहल अछि। हुनका एहि पर स्वागत करबाक चाही।
राष्ट्रगानक अपमानक मसले पर नीतीशक चारु तरफ आलोचना भऽ रहल अछि। विधानमंडलक बजट सत्रमे रोज एहि मुद्दा पर हंगामा भ’ रहल अछि। नीतीश कुमारसँ माफी केर माँग भऽ रहल अछि। ओतहि शनिकेँ पटना समेत सभ जिला मुख्यालय पर महागठबंधनक धरना प्रदर्शन चलैत रहल। नीतीशक पुतला दहन कयल जा रहल अछि।
चुनावी वर्ष आ अइ स्थितिमे विपक्ष एहि मुद्दा के छोडबाक मूडमे नहि अछि, किएक तऽ नीतीश कुमारकेँ विपक्ष पहिनहिसँ बीमार बताबयमे लागल अछि, आब सीएम खिलाफ एहि मुद्दा केर विपक्ष एतेक आसानीसँ जाए नहिं देत।
