प्रखंड संसाधन केंद्र जयंतीपुरमे दिव्यांग बच्चा सबहक प्रमाणीकरण लेल चिकित्सा शिविरक आयोजन कयल गेल छल। मेडिकल टीम द्वारा शिविरमे 137 बच्चाक पंजीकरण कयल गेल, जाहिमेसँ किछु बच्चाकेँ प्रथम दृष्टया दिव्यांग प्रमाणीकरण ओतहि कयल गेल जखनकि किछु बच्चाकेँ दरभंगा चिकित्सा महाविद्यालय रेफर कयल गेल।
टीममे अस्थि रोग , ईएनटी , मनोचिकित्सक सहित श्रवण शक्ति जांचबाक उपकरणक संग चिकित्सक सभ मौजूद छलाह। जिला विधिक सेवा प्राधिकार दरभंगाक सचिव आरती कुमारी जानकारी दैत कहलनि जे किशोर न्यायालय अनुश्रवण समिति आ उच्चतम न्यायालय नई दिल्ली केर निर्देश पर दिव्यांग बच्चा सबहक प्रमाणीकरण आ चिकित्सा सुविधा मुहैया करेबाक लेल प्रखंडस्तरीय मेडिकल कैंपक आयोजन कयल जा रहल अछि।
जिलाधिकारीक आदेश पर दिव्यांगजन सशक्तिकरण कोषांग , सिविल सर्जन , जिला शिक्षा पदाधिकारी , समाज कल्याण विभाग आदि केर समन्वय आ सहयोगसँ ई कैंप लगाओल जा रहल अछि । शिविरमे मौजूद चिकित्सक सभ बतेलनि जे आफलाइन फार्म भरिकय दिव्यांग बच्चा सभ केर पंजीकरण कयल गेल अछि जकरा सभकेँ बादमे विभाग द्वारा आनलाईन कयल जायत।
शिविरमे सिविल सर्जन डाॅ० अरुण कुमार , चिकित्सा पदाधिकारी , प्रभारी चिकित्सा पदाधिकारी डाॅ० कुमारी भारती , डाॅ० वसीम अहमद , डाॅ० अमित कुमार, डाॅ० सुदीप डेनियल मिंज, डाॅ० नीरज कुमार , प्राधिकार सहायक कुमार गौरव , एएलपी मो० मुस्ताक अहमद , मिथिलेश कुमार , पीएलवी ऊषा कुमारी, रीना देवी आदि मौजूद छलथि।
