वित्त मंत्री निर्मला सीतारमण बुधदिन कहलनि जे सरकार अपन नागरिकक जीवनयापन आसान बनाबय लेल पूर्ण रूपसँ प्रतिबद्ध अछि आ एहि दिशामे आओर कदम उठओत। मोदी सरकार ३.० मे एक बेर फेर वित्त मंत्रालयक कार्यभार सम्हारलाक बाद ओ ई बात कहलनि।
भोरमे नॉर्थ ब्लॉक पहुँचला पर वित्त सचिव टी.वी. सोमनाथन आ वित्त आ कॉरपोरेट मामिलाक मंत्रालयक अन्य सचिव लोकनि हुनक स्वागत कयलनि आ हुनका वर्तमान नीतिगत मामिलाक जानकारी देलनि।
वित्तमंत्री कहलनि जे पछिला १० सालमे मजबूत नेतृत्व आ विकासोन्मुख प्रशासन विभिन्न क्षेत्रमे पैघ परिवर्तन अनलक अछि आ अर्थव्यवस्था मजबूत भेल अछि।
ओ कहलनि जे २०१४ सँ चलि रहल सुधार जारी रहत। एहिसँ अर्थव्यवस्था आओर मजबूत होयत आ देशक विकासक गति बढ़त। ओ हालक सालमे वैश्विक चुनौतीक सामना करैत भारतक उल्लेखनीय विकासक गाथाक उल्लेख कयलनि आ कहलनि जे आबयवला वर्षक लेल आर्थिक दृष्टिकोण आशावादसँ भरल अछि। वित्त मंत्री मंत्रालयक अधीन विभिन्न विभागसभसँ आग्रह कयलनि जे ओ एनडीए सरकारक विकास एजेण्डाकेँ नव जोशक सङ्ग आगू बढ़ावथि आ तदनुसार नीति तैयार करथि जाहिसँ प्रधानमंत्री नरेन्द्र मोदीक ‘विकसित भारत’क दृष्टिकोणकेँ पूरा कयल जा सकय।
ओ कहलनि जे सरकार ‘सबका साथ, सबका विकास, सबका विश्वास, सबका प्रयास’मे विश्वास करैत अछि। ओ उद्योग जगतक दिग्गज, नियामक आ नागरिक सहित सभ हितधारकक बीच निरंतर सहयोग आ तालमेलक आवश्यकतापर जोर देलनि।
